МУ-ын иргэн бүрд олгох Эрдэс Тавантолгойн хувьцаа эзэмшихээр иргэд дансаа нээлгэж эхэлжээ
Уншсан 3677 vote 0 2011.02.13 16:29:38“Ээ битгий урдуураа хүн оруулаад байгаач. Өглөөнөөс хойш зогслоо шүү дээ” гэж бухимдах иргэдийн урт цуваан дунд дугаарлан зогсох ч хэцүү шүү. Гэтэл дахиад л өнөөх шинэчилсэн бүртгэл 70, 10 мянган төгрөг шиг урт дараалалд зогсох нь гэх болгоомжлол төрөх болов. Учир нь Монгол Улсын иргэн бүр “Эрдэнэс Тавантолгой” ХК-ийн 550 ширхэг хувьцааг үнэ төлбөргүй эзэмших эрхтэй болсон.
Харин хувьцааг шуудхан бидний түрийвчинд хийх эсвэл Хүний хөгжил сангийн өнөөх шар дэвтэрт биччихэж болохгүй болохоор аль нэг брокер, дилерийн компанид хандаж данс нээлгэх нь гарцаагүй болж байна. Өнөөдрийн байдлаар манай улсын нийт иргэний 400 мянга орчим нь л хувьцааны данстай. Бас энэ 400 мянга орчим иргэний 10 хүртэлх хувь нь өөрийгөө хувьцаа эзэмшигч гэдгээ мэдэхгүй явж байж мэдэх юм. Тэгэхээр холбогдох газруудаас хэлсэн хэлээгүй иргэдийг хувьцааны данстай болгох том ажил ундрах нь нэгэнт тодорхой болж байна. Угаасаа өнгөрсөн оны долдугаар сарын 7-нд гарсан УИХ-ын 39 дүгээр тогтоол, мөн оны аравдугаар сарын 20-ны өдрийн Засгийн газрын 272 дугаар тогтоолд “хувьцаа” гэх үг хэнд ч ойлгомжтой дурайж байгаа. Иргэн бүрт хүртээх 550 ширхэг хувьцааг энэ оны эхний хагаст багтаан иргэдийн данс руу шилжүүлнэ гэж “Эрдэнэс Тавантолгой” ХК-аас мэдэгдсэн байдаг.
Бага тойруу орчмын брокерийн пүүсүүдээс сонгон нэгээр нь үйлчлүүлсэн юм. Хаалган дээрээ хадсан цагийн хуваарьт нь 08.30-19.30 цаг гэжээ. Цайны цаг байдаггүй бололтой. Данс нээлгэхийг хүсэгчид цөөнгүй ирсэн мэт хүлээлгийн танхимд хүмүүсийн цуваа тасрахгүй байлаа. Тус газрын брокер бүсгүйчүүд “Өө цаас дуусч байна шүү дээ” гэж хоорондоо ярих нь үйлчлүүлэгч олон ирж байгааг илтгэх аж. Тэд “Иргэд данс нээлгэхдээ аль ч брокерийн пүүсийг сонгож авах боломжтой. Шаардлагатай зүйл нь иргэний үнэмлэх, хүүхэд бол төрсний гэрчилгээгээ авчирна” хэмээн товч мэдээллийг өгч байв. Уг пүүс 2009 онд байгуулагджээ. Одоогоор нийслэл, орон нутагт салбар пүүсгүй бусад 40 гаруй пүүсийнхээ нэг нь. Гэхдээ холбогдох газруудаас гаргасан мэдээлэлд муугүй үр дүнтэй ажиллаж буй юм билээ. Он гарснаар иргэдийн данс нээлгэх байдал эрчимжсэн аж. Энэ пүүст л гэхэд жилийн өмнө хувьцааны данс нээлгэхээр өдөртөө 30-аас илүүгүй иргэд ирдэг байсан бол өнөөдөр өдөрт 100 гаруй хүн үйлчлүүлж байгаа гэнэ. Мөн брокерийн пүүст нээсэн дансыг хөрөнгийн бирж дээр бүртгэх ажил ганцхан өдөрт бүтдэг байсан бол саяхнаас ачаалал нэмэгдэж нэг, хоёр өдөртөө амжихаа байсан аж.
Иргэд дансаа нээлгэхдээ дансандаа заавал мөнгөтэй байх шаардлагагүй. Үүнийг иргэн бүрт хүртээх 550 ширхэг хувьцаагаа хадгалах түрийвч гэж ойлгож болно. Гэхдээ нэгэнт данс нээлгэсэн байхад яагаад ганц нэг хувьцаа худалдан авч, зарж үзэж болохгүй гэж. Энэ талын мэдлэггүй гэж өөрийгөө голох хэрэггүй. Учир нь аль ч брокерийн пүүсүүд анх данс нээлгэж буй иргэдэд хувьцааны талаар ойлголт өгөх зорилгоор үнэ төлбөргүй сургалт явуулдаг юм билээ.
Брокерийн пүүсүүдээр үйлчлүүлж буй иргэд 550 ширхэг хувьцааны нэгж бүр нь хэчнээн төгрөгийн үнэтэй байх талаар нэлээд сонирхож байгаа аж. Харин одоогоор энэ талаар бодит мэдээлэл гараагүй байгаа билээ. Гэхдээ өнөөдөр нэгж бүр нь 100 төгрөгийн үнэтэй байж магадгүй гэж тооцоолж буй уг 550 ширхэг хувьцаа ирээдүйд хэд ч хүрч болох юм. Ямар ч байсан сүүлийн жилд Хөрөнгийн биржийн ТОП-20 индекс тасралтгүй өсч байгаа болохоор энэ 550 ширхэг хувьцаа 20, 30-хан мянган төгрөгийн үнэтэй байхгүй нь лавтай. ТОП-20-ийг тэргүүлэгч орон нутгийн өмчит “Тавантолгой” ХК-ийн нэгж хувьцааны үнэ 2004 онд 200-хан төгрөгийн үнэтэй байсан бол өнөөдөр сая төгрөгт хүрээд байгааг анзаараарай. Мөн “Эрдэнэс Тавантолгой” ХК-ийг “Энержи Ресурс”-тай харьцуулж үнэлсэн олон баримт байх юм билээ. Хэрвээ “Энержи Ресурс”-тай адилтгавал нөөцийн үнэлгээ нь 900 тэрбум ам.доллар орчим байна. Үүний 10 хувь есөн тэрбум ам.доллар. Чамгүй тоо гарч ирж байгаа юм.
Иргэдийг дансаа нээлгэсний дараа Үнэт цаасны төлбөр тооцоо, төвлөрсөн хадгаламжийн төвөөс долоохон хоногийн дотор иргэдийн дансанд хувьцааг нь хийх юм билээ. Энэ бол компьютераар явуулах механик үйлдэл тул ядах юм байхгүй биз. Харин манай улсад үйл ажиллагаа явуулж буй 40 гаруй брокерийн пүүс иргэдийг энэ оны эхний хагаст багтаан данстай болгож амжих болов уу. Үүнийг дагаад брокер дилерийн компаниуд салбар пүүсээ байгуулах, брокеруудынхаа тоог нэмэх шаардлага тулгарч байгаа бололтой. Энэ мэтээр хөрөнгийн зах зээлд “балчирдах” үзэгдэл эхнээсээ гарч эхэллээ. Саяхан нэгэн гэр бүл дээхнэ үед иргэдэд олгосон цэнхэр, ягаан тасалбараасаа болж уг брокерийн пүүсийн зааланд зад маргалдацгаасан байна. Учир нь хадгалж байсан цэнхэр тасалбар нь АПУ ХК-ийн 20 сая төгрөгийн үнэтэй хувьцаа байсан бөгөөд эзэмшигч нь эхнэрээсээ салахаар шийдсэн байж. Тиймээс тэд 20 сая минийх, чинийхдээ тулсан бололтой. Нээрээ л 90-ээд оны үед хувьцааг хүн бүрт биш гэр бүл дунд нь өгчихдөг байсан нь энэ төрлийн маргаан дахин дахин үүсэх шалтгаан болж байгаа аж. Нөгөө талаар 20-хон жилийн түүхтэй манай улсын хувьцаа, хөрөнгийн зах зээл дэх бас нэгэн туршлага болж байгаа биз.
Зохиогчийн эрх:
"Улс төрийн тойм" сонин