Ц.Элбэгдорж нь 1963 оны 03 дугаар сарын 30-нд Ховд аймгийн Зэрэг суманд төрсөн. Гэр бүлтэй, Таван хүүхэдтэй..  
Ц.Элбэгдорж нь 1979 онд Ховд аймгийн Зэрэг сумын 8 жилийн сургууль, 1981 онд Эрдэнэт хотын 1-р арван жилийн сургууль, 1988 онд Уркайны Львовын ЦУТДСургууль, 2002 онд АНУ-ын Харвардын Их Сургуулийг тус тус төгсч, сэтгүүлчийн бакалавр, Төрийн удирдлагын мастер зэргийг хамгаалсан. Англи, орос хэлтэй.

Ц.Элбэгдорж нь дараах ажил алба, сонгуульт ажлуудыг эрхэлсэн байна:
1981-1982: “Эрдэнэт” үйлдвэрт засварчин, машинист,
1982-1983: Ардын армид байлдагч, түрүүч, ХЗЭ-ийн үүрийн дарга
1988-1990: “Улаан-Од” сонинд сурвалжлагч, Армийн утга зохиолын нэгдлийн  эрхлэгч (энэ хугацаандаа ардын армид байсан “оны ялгаа”-ны харгис шинж чанарыг уйгагүй илчилж, шүүмжилж, цэргийн эрүүл мэнд, амь насны төлөө тэмцэж байв.)
1989-1991: МоАХ-ны тэрүүлэгч (энэ хугацаандаа Ардчиллыг авчрах анхны цуглааныг нээж байжээ)
1990:     “Ардчилал” сонины эрхлэгч (энэ хугацаандаа ардчиллын үнэт зүйлсийн тухай мэдээллийг ард түмэнд түгээж, монгол хүн хүний эрхийн түгээмэл тунхаглалд заасан бүх эрх, эрх чөлөөг эдлэх ёстой гэдгийг сурталчилж нийгмийн сэтгэхүйд өөрчлөлт авчрав.)
1990-1992: АИХ-ын депутат, УБХ-ын гишүүн (энэ хугацаандаа Монгол Улсын шинэ үндсэн хуулийг батлалцаж, улс төрийн эдийн засгийн шилжилтийг нэгэн зэрэг хийх, Монгол улсын ардчилал зах зээлд тууштай шилжүүлэх байр суурийг баримталж байв.)
1991:     Монголын Ардын Аж Ахуйтны холбооны тэргүүн (энэ хугацаандаа малыг малчдад хэмээх хөдөлгөөн өрнүүлж мал хувьчлах тухай шийдвэр гаргуулав.)
1992-1994: Монгол Улсын Их Хурлын гишүүн (энэ хугацаандаа хувьчлалыг гүнзгийрүүлэх, газар хувьчлахыг эрх баригчдаас шаардаж байв.)
1992 оноос: “Залуу удирдагч” сангийн удирдлагын зөвлөлийн байнгын гишүүн
1993 оноос: Улс төрийн боловсролын академийн захиралын зөвлөлийн гишүүн
1994-1996: МҮАН-ын Ерөнхий зөвлөлийн гишүүн
1994-1996: Үндэсний аюулгүй байдлын зөвлөлийн шинжээч
1996-1999: МҮАН-ын дарга
1996-2000: УИХ дахь “МҮАН-МСДН-ын Ардчилсан Холбоо” Эвслийн дарга (энэ хугацаандаа орон сууц хувьчилах, татварыг багасгах, их хувьчлал явуулах, хэвлэлийн эрх чөлөөг хангах, АНУ-ын зах зээлийн Монголын үйлдвэрлэгчдэд нээж өгөх гэх мэт олон ажлыг хийсэн)
1996-1998: УИХ-ын дэд дарга, Цагаатгах ажлыг удирдан зохион байгуулах улсын комиссын дарга (энэ хугацаандаа төр ард түмнээсээ уучлал гуйх тухай шийдвэрийг гаргуулж, хэлмэгдэгсдийн ар гэрт нэг сая төгрөгийн нөхөн олговорыг олгуулсан байна. Улс төрийн хэлмэгдэгсдийн дурсгалыг хүндэтгэх өдөртэй болов.)
1996-2000: УИХ-ын гишүүн, Монголын парламентын бүлгэмийн гүйцэтгэх хорооны дарга (энэ хугацаандаа Монголын парламентын гадаад харилцааг эрс нэмэгдүүлэв.)
1998:         Монгол Улсын Ерөнхий сайд, Ерөнхий сайдын үүрэг гүйцэтгэгч (энэ хугацаандаа бөхийн өргөөг байгуулахад туслалцаа үзүүлсэн, татварын орлогыг бүрдүүлэх зоримог алхам хийсэн.)
2000 оноос:  “Эрх Чөлөө төв”-ийг үүсгэн байгуулагч, хүндэт ерөнхийлөгч.
2004-2006:  Монгол Улсын Ерөнхий сайд (энэ хугацаандаа хүүхдийн мөнгийг анх олгох, мэргэжлийн сургалтын төвүүдийг хөгжүүлэх, Чингис хааны хөшөө цогцолборыг байгуулах, мэдээлэл харилцаа холбооны газрыг байгуулж интернэтийн үнийг хямдруулах, Европын Холбооны зах зээлийг Монголчуудад нээж өгөх зэрэг ажлуудыг хийжээ.)
2005-2008: Ардчилсан Намын дарга (энэ хугацаанд Ардчилсан Нам “Дөрвөн 10” хэмээх бодлогыг амжилттай хэрэгжүүлж бүх төрлийн татварыг 10 хувь болтол бууруулах, ажил олгогчдын төлдөг нийгмийн даатгалын шимтгэлийн хувийг 10 хувь болгож бууруулах ажлыг амжилттай хийж татвар төлөгч, ажил олгогчдын ачааллыг эрс багасгав. Хүүхдийн мөнгөний амлалтаа бүрэн биелүүлэв)
2008-оноос: УИХ-ын гишүүнээр ажиллаж байна.

Монгол Улсын Ерөнхийлөгчийн сонгуулийн урьдчилсан дүнгээр Ардчилсан намаас нэр дэвшигч Цахиагийн Элбэгдорж ялалт байгуулаад байна.

Тэрбээр 8 аймаг, нийслэлийн 7 дүүрэгт үнэмлэхүй ялалт байгуулсан тухай АН-ын удирдлагууд болон тус намын сонгуулийн төв штабаас өнөөдөр өглөө 6 цагт нижигнэсэн алга ташилтын дунд, баяр хөөртэйгээр олон нийтэд мэдээлж, ардчиллыг дэмжсэн сонгогчиддоо талархаж буйгаа илэрхийллээ.

Харин МАХН-аас нэр дэвшигч Намбарын  Энхбаяр 13 аймагт өрсөлдөгчөөсөө илүү санал авчээ. Hийлбэр дүнгээрээ Ц.Элбэгдорж илт давж, өрсөлдөгчөөсөө нийт 35 мянган саналын зөрүүгээр тасарсан мэдээтэй байна.

МАХН-ын хэвлэлийн бага хурал энэ өдөр хэдэнтээ хойшилсны эцэст 12.20 цагт Төрийн ордонд болж, Eрөнхийлөгч Н.Энхбаяр СЕХ-ны албан ёсны дүн гараагүй байгаа ч Ц.Элбэгдоржийг сонгуульд ялсныг хүлээн зөвшөөрч буйгаа илэрхийлж, өөрийнх нь төлөө саналаа өгсөн нийт дэмжигчиддээ баярлаcнаа мэдэгдэв.

Тэрбээр цааш нь  "Ерөнхийлөгчийн хувьд эв нэгдлээ илэрхийлж, ард түмнээ цулаар нь харж, тулгамдсан асуудлаа шийдэхийн төлөө УИХ, Засгийн газартай хамтран ажиллаарай. Би Ц.Элбэгдорж руу утасдаж, эсвэл урьж уулзаж энэ бүх саналаа хэлнэ. Би Монголынхоо ард түмэнд үргэлж баярлаж явдаг. Цаашид бидний хамтын ажиллагаа идэвхтэй өрнөж, би өөрийнхөө мэдлэг боловсрол, туршлагаа улсынхаа хөгжлийн төлөө харамгүй дайчлан ажиллах болно гэдгээ илэрхийлье" хэмээлээ.

Мөн МАХН-ын дарга С.Баяр "МАХН сонгуулийн дүнд будилаан гарлаа гэсэн байдлаар хандахгүй ээ. Сонгуулийн дүнг бид хүлээн зөвшөөрсөөр ирсэн. Одоо ч хүлээн зөвшөөрч байна. Цаашдаа ч хүлээн зөвшөөрнө гэдгийг МАХН-ын даргын зүгээс илэрхийлж байна. Энэ сонгуульд бидэнтэй өрсөлдсөн Ардчилсан нам, сонгогчдын олонхийн санал аваад байгаа нэр дэвшигч Ц.Элбэгдоржид баяр хүргэж байна. Монгол Улсын Ерөнхийлөгчөөр сонгогдоод Монгол Улсын Үндсэн хуулинд заасанчлан Монголын ард түмний эв нэгдлийн илэрхийлэгч байж үүргээ чандлан биелүүлнэ гэж МАХН найдаж байна. МАХН-аас сонгуульд амласан, олон түмэндээ хүргэсэн олон санаа санаачлагаа ажил хэрэг болгохын төлөө зүтгэнэ гэдгээ хэлэх байна" хэмээн ярьж байна.

Ийнхүү монголчуудын дийлэнх нь ардчилсан шинэ Ерөнхийлөгчид хувь заяагаа даатган маш их итгэл найдвар, өндөр хариуцлага хүлээлгэсэн нь тодорхой болоод байна.

Сонгуулийн ерөнхий хорооны албан ёсны дүн хуулийн дагуу тав хоногийн дотор гарах юм байна. Гэхдээ СЕХ-г өнөөдөртөө багтаж урьдчилсан дүнгийн талаар албан ёсны мэдээлэл өгнө байх хэмээн сонгогчид хүлээсээр...