600 мВт эрчим хүч үйлдвэрлэх хүчин чадал бүхий нүүрсний цахилгаан станц байгуулах тусгай зөвшөөрлийг Канадын уул уурхайн “Prophecy Resource” компанид Монголын Эрчим хүчний зохицуулах газраас олгосон талаар “Reuters” уламжлав. Улаан-Овоо, Чандгана тал, Чандгана хавтгайн нүүрсний ордын ашиглалтын тусгай зөвшөөрлийг эзэмшдэг тус компани цахилгаан станцынхаа барилгын ажлыг 2013 оны эхний улиралд багтаан эхлүүлэхээр төлөвлөжээ.

150 мВт эрчим хүч үйлдвэрлэх хүчин чадал бүхий дөрвөн блокоос бүрдэх уг станцын эхнийх нь 2016 оны нэгдүгээр сард ашиглалтад орох аж. Харин эрчим хүч үйлдвэрлэхэд шаардагдах нүүрсийг 141 сая тонн нүүрсний нөөцтэй Чандгана талын ордоос нийлүүлэхээр төлөвлөсөн байна. Уг станцыг Хэнтий аймгийн Өндөрхаан хотоос 60 км, нийслэлийн Багануур дүүргээс 150 км-ийн зайд байгуулах аж. Олон улсын валютын сангийн шинжээчдийн тооцоолсноор манай улс 2016 он гэхэд 600 мВт эрчим хүчний хомсдолд орох бөгөөд “Prophecy Resource” компанийн байгуулах уг станц нь хувийн хэвшлийн анхны нүүрсний цахилгаан станц болох аж.