-Байр захиалсан 9094 хүнээс 5935 нь сугалаанд оролцох шаардлага хангажээ-

“Буянт-Ухаа-1”  хороололд орон сууц авах өндөр настан, хөгжлийн бэрхшээлтэй иргэн, залуу гэр бүлийн сугалааг өчигдөр МҮОНТ-ийн хоёрдугаар сувгаар шууд дамжуулан хүргэлээ.

Тэдгээрээс 594 хүн байр авах эрхээ баталгаажуулав. Харин өнөөдөр төрийн албан хаагчдын сугалааг шууд дамжуулан хүргэж байна.

Тус хорооллын эхний ээлжинд 1764 орон сууц ашиглалтад орж байгаа бөгөөд энэ орон сууцанд 9094 хүн захиалга өгчээ. Үүнээс 3159 хүн хямд үнэтэй орон сууц захиалах журмын шаардлага хангаагүй тул бүртгэлээс хасагдсан байна.

Ингээд үлдсэн 5935 хүний дунд зорилтот бүлэг тус бүрээр нь захиалсан орон сууц тус бүрт сугалаа явуулсан юм.

Сугалаанд хамрагдах хүмүүсийн 3159 нь өндөр настан, хөгжлийн бэрхшээлтэй иргэн, залуу гэр бүл байгаа бол үлдсэн 2740 нь төрийн албан хаагч буюу эмч, багш, цагдаа нар байна.

Сугалаа хожсон иргэдийн бүртгэлийн кодыг өдөр тутмын сонинуудын даваа гаригийн дугаарт болон МҮОНТ-ийн www.mnb.mn, Төрийн орон сууцны корпорацийн tosk.gov.mn вэб сайтад нийтлэх юм байна.

1764 айлын орон сууц бүхий есөн давхар 28 барилга, 120 хүүхдийн цэцэрлэг, хоёр үйлчилгээний төвөөс бүрдсэн цогцолбор “Буянт-Ухаа-1” хорооллыг энэ сарын 23-нд хүлээлгэн өгснөөр оршин суугчид байрандаа орж эхэлнэ.