“Милан өсвөрийн зуслан-2012” хөтөлбөрийн нээлт өчигдөр нийслэлийн Сүхбаатар дүүргийн ерөнхий боловсролын VI сургуульд боллоо. Нийслэлийн ЗДТГ, Италийн “АС Милан” клубээс хамтран хоёр дахь жилдээ хэрэгжүүлж буй уг арга хэмжээнд оролцохоор хөтөлбөрийн менежер Марко Шембри, зургаан дасгалжуулагчийн хамт Монголд ирээд байна.

Хөтөлбөрт нийслэлийн төвийн зургаан дүүргийн 200 гаруй хүүхэд хамрагдаж, тав хоногийн сургуулилалтын дараа Милан хотыг зорих дөрвөн хүүхдийг шалгаруулах аж. Хүүхдүүд Монголын хөлбөмбөгийн холбооны талбай болон Сүхбаатар, Баянзүрх дүүргийн зургаа, 84, 97 дугаар сургуулийн биеийн тамирын талбайд бэлтгэл сургуулилалтаа хийнэ.