Л.ДҮГЭРЖАВ: Хэн түрүүлж хөл тавьж, хөрөнгө зарж чадна, тэр улс Антарктидаас хувь хүртэх боломжтой
Уншсан 7359 vote 0 2011.11.16 15:40:55
ШУТИС-ийн
профессор, Антарктидын нийгэмлэгийн тэргүүн, доктор, Л.Дүгэржав
Антарктидын экспедицэд ажиллахаар болсон талаараа өчигдөр сэтгүүлчдэд
мэдээллээ. Тус экспедицийн 20 жилийн ой энэ онд тохиож буй бөгөөд энэ
хүрээнд олон орны судлаач эрдэмтдийг хамруулсан томоохон баг судалгааны
ажил хийхээр болжээ. Өнгөрсөн жил энэ багт Португал, Герман, Испани,
Чили, Аргентин, Болгар, Монголын судлаачид ажиллаж байсан бол энэ удаа
Японы дөрвөн эрдэмтэн нэгдэж, Японы Засгийн газрын тусламжтайгаар
онгоцоор геологийн зураглал хийхээр болсон байна.
Мөн хэд хэдэн цооног өрөмдөж, Антарктид төвийн цэвдгийн температурын өөрчлөлтийг судлах юм байна. Уг судалгааны ажил арванхоёр дугаар сарын 1-нээс дараа жилийн хоёрдугаар сарын 1 хүртэл үргэлжлэх гэнэ. Энэ жил нийт гурван баг судалгааны ажил хийхээр болсон бөгөөд доктор Л.Дүгэржав Антарктидын экспедицийн II ээлжийн судлаачдыг ахалж явах юм байна. Түүний багт хоёр португали, дөрвөн япон, мөн Болгарын судлаачид гээд нийт 18 хүн багтжээ. Тэрбээр өмнө нь гурван ч удаа өмнөд туйлыг зорьж байсан нэгэн.
“Монгол Улсын Засгийн газар Антарктидын олон улсын конвенцид нэгдэн орох зүй ёсны шаардлага тавигдаж байна. Энэ конвецид нэгдэж орсноор монголчууд уг тивд өөрийн баазыг нээх эрх зүйн үндэс бүрдэнэ. Антарктид тив нь манай дэлхийн хуурай газрын 10 хувь, цэвэр усны нөөцийн 80 хувийг агуулдаг. Эрэг хавийн далай тэнгист асар их био масс оршдог. Ашигт малтмалын арвин их нөөцтэй. Тус тивийн газар нутгийн хуваарилалтын төлөөх тэмцэл аль хэдийнэ эхэлсэн. Хэн тэнд хөл тавьж, баазтай байж, судалгаа хийж, хүмүүсээ ажиллуулж, хөрөнгө зарж чадна тэр улс ирээдүйд хувьцаа хувь хүртэх боломжтой” хэмээн доктор Л.Дүгэржав ярилаа.
