Номхон далайн Самоа арлын нийслэл Апиа хотод энэ сарын 11-12-ны өдрүүдэд IJF-ийн Дэлхийн цомын тэмцээн болж өндөрлөлөө. 37 орны 106 эрэгтэй, 68 эмэгтэй жүдоч өрсөлдсөн энэ тэмцээнд манай улсаас эрэгтэй, эмэгтэй тус бүр гурван тамирчин хүч үзсэн. Тэмцээний эхний өдөр эрэгтэйчүүдийн хүнд, эмэгтэйчүүдийн хөнгөн жингийн барилдаанууд болж, манай бөхчүүдээс тав нь барилдсанаас дөрөв нь хүрэл медалийн төлөө өрсөлдөж, ганц нь л медаль дээр буужээ. Эмэгтэйчүүдийн 57 кг-д "Хилчин" спорт хорооны тамирчин Доржсүрэнгийн Сумъяа эхлээд хийлж, хоёрдугаар тойрогтоо Австралийн бөхөд хожигдсон ч АНУ, Хятадын бөхчүүдийг дараалан ялж, хүрэл медалийн болзол хангасан байна. Энэ нь түүний Дэлхийн цомоос авч буй тав дахь медаль нь юм. Тэрбээр өнгөрсөн жил Ташкент, Сувон, өнөө жил Улаанбаатар, Алматыгийн татамиас хүрэл медаль авсан билээ.

IJF-ийн чансаанд 212 оноотойгоор 40 дүгээр байрт бичигдэж буй Сумъяа энэ амжилтаараа 40 оноо нэмж, гурван байр урагшлах нь. Энэ жинд 264 оноотойгоор 34 дүгээрт эрэмбэлэгдэж байгаа Т.Баттөгс эхний тойрогт Их Британийн жүдочид торгуулиар ялагдав. Т.Баттөгсийн хувьд олон улсын тэмцээнүүдэд хийсэн барилдааныг нь харахад үнэлгээ бараг алдахгүй байгаа нь сайшаалтай боловч өөрөө мөн үнэлгээ авч чадахгүй, голдуу торгуулиар хожигддог дутагдал нь засрахгүй хэвээр байна. +100 кг-д Намсрайжавын Батсуурь Их Британийн бөхийг ялж, Исландын бөхөд хожигдоод торгуульд Шинэ Зеландын жүдочийг ялсан ч хүрлийн төлөө БНХАУ-ын Ван Хаод ялагдлаа. Монголд болсон Дэлхийн цомд Батсуурь залуучуудын дэлхийн аваргын мөнгөтэй энэ Хятадыг ялж байсан юм.

Энэ жилийн УАШТ-д түрүүлснээсээ хойш олон улсын тавцанд барилдах болсон Н.Батсуурь энэ хугацаанд чансааны 136 оноо цуглуулж, эрэгтэйчүүдийн хамгийн хүнд жинд 52-рт орж ирсэн. Самоад 5-р байрт орж, 20 оноо авснаар түүний байрт өөрчлөлт гарахгүй. 90 кг-д барилдсан Эрдэнэбилэгийн Энхбат Австралийн Якуб Савчукийг ялж, Их Британийн Уинстон Гордонд хожигдоод торгуульд Украины Роман Гонтюкийг ялсан ч хүрэл медалийн төлөө барилдаанд АНУын Жэкоб Ларсенд дийлдлээ. Чансаагаар жиндээ 234 оноотойгоор 38-д байгаа Энхбатын хувьд 30 орчимд бичигдэж чадвал олимпийн эрх авчих магадлалтай юм. Эрэгтэйчүүдийн эхний 22 тамирчин олимпийн эрх авах ба 90 кг-д Япон, ОХУ, Узбекистан, Бразил, Украин зэрэг орны бөхчүүд тогтоогдсон бүст хоёр болон түүнээс дээш тоогоор орсон байгаа бөгөөд яг одоогийн оноогоор тооцоо гаргавал 31-рт эрэмбэтэй Кыргызстаны Чингиз Мамедов олимпийн эрх авахаар байна.

Э.Энхбат Самоагаас 20 оноо авч, 35 руу ахих болжээ. 81 кг-д Отгонбаатарын Ууганбаатар Фижи гийн бөхийг ялж, Канадын бөхөд хожигдон торгуульд Австралийн Брент Айверсоныг буулган аваад хүрэл медалийн төлөө барилдаанд Туркийн Ахмет Сарид гурван торгууль буюу вазари үнэлгээгээр дийлджээ. О.Ууганбаатарын хувьд олимпийн эрх авахын тулд мөн л жиндээ 30 орчимд эрэмбэлэгдэх ёстой. Олимпийн эрхийг одоогийн оноогоор олговол 31-д 320 оноотой байгаа Бельгийн Йоахим Боттьеу сүүлийн буюу 22 дахь эрхийг авах бөгөөд Ууганаа 180 оноотойгоор 50-рт эрэмбэтэй буй юм. Харин Дэлхийн цомын хоёр дахь өдөр +78 кг-д 321 оноотойгоор 26-рт эрэмбэлэгдэж буй (түүний жингийн 19 дэх жүдоч Германы Францишка Кониц 458 оноотойгоор олимпийн эрхийн бүст багтаж байгаа) гавьяат тамирчин Д.Цэрэнханд барилдлаа.

Тамирчин-дасгалжуулагчийн үүргийг давхар гүйцэтгэсэн гавьяат маань эхний даваандаа Их Британийн Карина Брайнтад 3.46 минутад цэвэр ялагдсан байна. Түүний жинд ердөө тавхан бөх зодоглосон тул Цэрэнхандад хүрэл медалийн төлөө барилдах боломж гарч ирсэн. Харамсалтай медалийн төлөөх барилдаанд тэрбээр мөн л Их Британийн Сара Адлингтонд 2.58 дахь минутад иппоноор хожигджээ. Самаогийн Дэлхийн цомд нэг хүрэл медаль, дөрвөн шагналт байр эзэлсэн манайхан багийн дүнгээр 37 орноос 17 дугаар байрт орсон байна.