МҮЭ-ийн холбооноос шатахууны үнэ 80, талхны үнэ 20 төгрөгөөр нэмэгдсэн шалтгааныг бие даасан шинжээчээр дүгнүүлж, тодорхой шийдэлд хүрэхээ мэдэгдсэн. Тус холбоо хол богдох байгууллагуудтай хэлэлцээр хийснээ өчигдөр сэтгүүлчдэд мэдээлэв. Энэ үеэр МҮЭ-ийн холбооны ерөнхийлөгч С.Ганбаатараас зарим асуултад хариулт авлаа.
-Хэлэлцээрт урьсан байгууллагууд бүгд ирсэн үү. Шатахууны үнийг зохиомлоор нэмсэн нь тогтоогдсон уу?
-Холбогдох бүх байгууллагад хэлэлцээр хийх урилга хүргүүлсэн Эрчим хүчний газар, Шудрага өрсөлдөөн, хэрэглэгчийн төлөө газар, Монголын хэрэглэгчдийн эрх ашгийг хамгаалах нийгэмлэгүүдийн үндэсний холбоо, “Талх чихэр” ком панийн удирдлагууд ирсэн. Нефть импортлогч компаниудаас хүн ирээгүй. Нефть импортлогчид тооцоо, судалгаа гүйгээр үгсэн хуйвалдаж, үнээ нэмсэн нь тогтоогдсон. Тиймээс “Магнай трейд”, “Петровис”, “Шунхлай”, “Сод Монгол” өнөөдрөөс (өчигдөр) шатахууныхаа үнийг 30 төгрөгөөр буулгалаа.
-Бусад нь үнээ буулгахгүй хэрэг үү?
-Үүнийг ЭБЭХЯ болон бусад хяналтын байгууллага удахгүй шийдвэрлэх байх. Шатахууныхаа үнийг үндэслэлгүй нэмсэн компанийн лицензийг хураах хүртэл арга хэмжээ авна гэж сайд нь хэлсэн байна лээ.
-Оросууд манайд экспортолж буй шатахууны үнээ үнэхээр нэмж үү. Ямар үн дэслэлээр ийн нэмснийг нь шалгасан уу?
-Шатахууны үнэ дөрөвдүгээр сарын 28-29-нд шилжих шөнө литр тутамд 80 төгрөгөөр нэмэгдсэн. Үүнийгээ ОХУ манайд нийлүүлэх шатахууны үнээ нэмсэн гэж тайлбарласан ч худлаа болох нь нотлогдсон. Өнгөрсөн сарын 28-нд ОХУ-аас импортолсон шатахуунаа компаниуд өмнөх үнээрээ оруулж ирснийг Гаалийн ерөнхий газраас баталгаажуулсан. Нефть импортлогчид сургаар, ямар ч тооцоо судалгаагүйгээр үнээ нэмсэн нь тодорхой.
Чингэлтэй дүүргийн XIV хороонд байрлах “Магнай трейд” компанийн ШТС-ын ажилтан Б.Гэрэлээс шатахууны үнэ хямдарсан эсэхийг тодруулахад “Газрын тосны 70 жилийн ойг тохиолдуулан шатахууны үнийг литр тутамд 50 төгрөгөөр хямдруулаад байсан. Хямдралын хугацаа дуусахад хямдраагүй үнэ дээрээ литр тутамд 30 төгрөг нэмсэн юм. Өнөөдрөөс 30 төг рөгийн нэмэгдлээ болиулж, хуучин үнээр нь зарах шийдвэр ирсэн” гэв.
