“Оюутолгой” компани оюутан, залуусын дунд гадаадын их, дээд сургуульд суралцуулах тэтгэлэгт хөтөлбөр зарлажээ. Үйлдвэрлэл эхлэх хүртэл эхний удаад 45 хүүхэд шалгаруулж, Америк, Канад, Австралийн нэр бүхий их, дээд сургуульд 100 хувийн тэтгэлгээр суралцуулах гэнэ. Уул уурхайн инженер, уул уурхайн үйл ажиллагаа, мэдээллийн технологийн инженер, геологич, цахилгааны болон механик инженер зэрэг мэргэжилтнүүд тэтгэлэгт хамрагдах боломжтой.
“Тэтгэлэгт хамрагдах залууст өндөр шалгуур тавьж байгаа. Голч дүн нь 3.2-оос дээш, сүүлийн хоёр жилд TOEFL-ийн шалгалтад 550- аас дээш оноо авсан, интернэтээр шалгуулсан бол 79-ээс дээш оноотой байх хэрэгтэй. Мөн IELTS-ийн шалгалтад 6.5-аас дээш оноо авсан их сургуулийн хоёр, гуравдугаар дамжааны оюутан байж болно. Магистр бол сургуулиа төгсөөд удаагүй байх ёстой” гэж тус компанийн Олон нийт, мэдээлэл харилцааны хэлтсийн ажилтан Ц.Ганзориг ярилаа.
Бүртгэлийн материалыг энэ сарын 16-ныг хүртэл “Зориг сан”-д хүлээж авах юм байна.
