Өмнөд Солонгосын тагнуулын албанынхан өнөөдөр шөнө Хойд Солонгос алсын
тусгалтай, цоо шинэ загварын пуужин хөргөхөөр бэлтгэж байгаа талаар
мэдээлэл авчээ. Одоогоор энэ талаар шалгаж байгаа тухай Өмнөд
Солонгосын “Йонхап” агентлаг мэдээлсэн байна. Хойд Солонгос нь зөвхөн
энэ сард л гэхэд нийт долоон удаа пуужингийн туршилт хийгээд байгаа юм.
Пуужингуудыг Солонгосын хойгийн Мусудан полигионоос хөөргөсөн бөгөөд
тэдгээр нь 100 километрийн зайн тусгалтай, шинэ загварын пуужингууд
бөгөөд тухайн үед хөдөлгөөнт сууринаас хөөргөсөн тул гадаадын
тагнуулынханд илрээгүй байна. Хятадын Ерөнхий сайд Вэнь Зябао тус
улсад албан ёсны айлчлал хийх үеэр БНАСАУ-ын удирдагч Ким Чен Ир
Солонгосын хойгийг цөмийн зэвсэггүй болгох зургаан талт хэлэлцээрт
эргэн нэгдэх талаар найдвар төрүүлэхүйц мэдэгдэл хийсэн билээ. Хятадын
Ерөнхий сайдын айлчлал Пхеньяныг хэлэлцээрийн ширээний ард дахин
суулгахад ихээхэн нөлөөлнө хэмээн олон улсын ажиглагчид таамаглал
дэвшүүлж байв. БНАСАУ энэ асуудлыг хоёр талын болоод олон талын гээд
аль ч форматаар авч хэлэлцэхэд бэлэн гэдгээ албан ёсоор мэдэгдсэн. Тус
улс энэ онд газар доор нэлээд өндөр чадвартай цөмийн туршилт хийж,
хиймэл дагуул хөөргөснөөр олон улсын байгууллагын хориг арга хэмжээ
авахуулсан билээ. АНУ-ын тал тус улстай зөвхөн зургаан талын
хэлэлцээний хүрээнд хоёр талын хэлэлцээ хийхийг зөвшөөрсөн бөгөөд энэ
хэлэлцээ хаана, хэзээ болох талаар тодорхой шийдвэрт хүрэлгүй сар гаруй
хугацаа өнгөрчээ. Хойд Солонгостой зургаан талын хэлэлцээний хүрээнд
хоёр талын хэлэлцээ хийх талаар АНУ-ын Төрийн департаментаас хийсэн
мэдэгдэлд “Бид Хойд Солонгос улстай хоёр талын хэлэлцээ хийх бэлтгэл
ажилдаа орсон. Гэхдээ хэлэлцээг ном журмын дагуу явуулах нь хамгийн
чухал” хэмээн АНУ-ын Төрийн нарийн бичгийн даргын туслах Филип Кровлей
ярьжээ. “Хоёр талын хэлэлцээ зургаан талын хэлэлцээний хүрээнд болно
гэдэгт найдаж байна. Энэ хэлэлцээ Хойд Солонгосыг цөмийн хөтөлбөрөөсөө
татгалзахыг уриалахад чиглэнэ” гэдгийг онцолсон юм. НҮБ-ын Ерөнхий
нарийн бичгийн дарга Пан Ги Мүн энэ жилийн Ерөнхий ассамблейн
чуулганаар цөмийн зэвсэг хураахыг уриалсан. “Дэлхийд 20 мянга гаруй
цөмийн байлдааны цэнэг хуримтлагдсан байгаа. Цөмийн зэвсгийг
хэрэглэхгүй байсан ч асар их аюултай юм. Учир нь золгүй тохиолдол ямар
ч үед гарч мэднэ. Түүнээс гадна цөмийн зэвсгийн үйлдвэрлэл хүн ардын
эрүүл мэнд, хүрээлэн буй орчинд хохирол учруулж байна. Гэхдээ цөмийн
зэвсэг террористуудын гарт орох нь хамгийн ноцтой аюул юм” хэмээн
тэрбээр тус мэдэгдэлдээ онцлон хэлсэн. Солонгосын хойгийн цөмийн
маргааныг намжаах үүднээс Иран улс хоёр Солонгосын хооронд зуучлагчаар
ажиллахад бэлэн гэж Ираны Гадаад хэргийн яамны сайд Манучер Моттаки
мэдэгдсэн юм. “Солонгосын хойгт энх тайван тогтоох тухай Солонгос
хоорондын хэлэлцээр, харилцан ойлголцолыг Иран улс нааштай хүлээн авч,
тус хоёр улсын хооронд зуучлагчаар ажиллан хамгийн үр дүнтэй гэсэн
ажлыг гүйцэтгэхэд бэлэн байна” гэжээ. Тэрбээр Тегеран хотноо Өмнөд
Солонгосын Гадаад хэргийн сайдын орлогч сайд И Ён Жонтой уулзахдаа ийн
ярилцсан аж. “Манай хоёр улсын хамтын ажиллагаа бүх салбарт тийм ч
тогтвортой биш байгаа. Цаашид Иран, Өмнөд Солонгос улс хамтын
ажиллагаагаа улам тогтворжуулна гэдэгт найдаж байгаа” хэмээн
мэдэгдэлдээ өгүүлжээ. Түүнчлэн Афганистанд хэрэгжүүлж буй эрүүл мэнд,
хөгжлийн тухай төслүүд дээр Иран улс Өмнөд Солонгостой хамтран
ажиллахад бэлэн байгаа гэдгийг Моттаки уулзалтын үеэр илэрхийлсэн аж.
“Бид Иран улстай эдийн засгийн салбарт харилцаагаа өргөжүүлэхийг хүсч
байна. Үүнээс гадна хамтран төслүүд хэрэгжүүлж, хоёр талын хамтын
ажиллагаагаа бэхжүүлэх сонирхолтой байгаа” гэж Өмнөд Солонгосын тал
мэдэгджээ. Энэ сарын эхээр Ираны нефть, хийн “Парс” компани Өмнөд
Солонгосын «Жи-Эс» компанитай хий боловсруулах тухай 1,2 тэрбум
ам.долларын хэлэлцээр байгуулсан билээ. Хэлэлцээрийн дагуу хоёр тал
Ираны Бушер мужийн Ассалое гэдэг “Парс” компанийн хий боловсруулах орд
газар хамтран ажиллах юм.