Өчигдөр 16 цаг 19 минут
Томуугийн А хүрээний H1N1 вирусийн халдвар авч лабораториор онош нь батлагдсан нийт хүний тоо өнөөдрийн байдлаар 216 болжээ. Үүнээс харуулдан тандалтын цэг буюу идэвхтэй тандалтын дүнд батлагдсан 135 хүн, эмнэлэгт хэвтэн эмчлүүлэгсдээс батлагдсан хүний тоо 81 байна. Мөн Дорнод, Сэлэнгэ, Өвөрхангай, Дархан-Уул, Хэнтий аймаг болон нийслэлийн Багануур, Налайх дүүргүүдэд шинээр өвчлөл бүртгэгдээд буй. Орон нутгийн иргэдийг тэнд нь тусгаарлан эмчилж байна.
Томуугийн А хүрээний H1N1 вирусийн халдвараас сэргийлэх, бэлэн байдлыг хангах Эрүүл мэндийн яамны ажлын хэсгийн өргөтгөсөн хурал хийлээ. Хуралд Томуугийн цар тахлын А хүрээний H1N1 вирусийн халдвараас сэргийлэх, бэлэн байдлыг хангах Эрүүл мэндийн яамны ажлын хэсгийн гишүүд, Дэлхийн эрүүл мэндийн Байгууллагын суурин төлөөлөгч Р.Виват, дотор, хүүхэд, халдварт, чих хамар хоолой, уламжлалт анагаах ухаан, эх барих эмэгтэйчүүдийн мэргэжлийн салбар зөвлөлийн дарга нар оролцов. Ажлын хэсгийн гишүүд А хүрээний H1N1 вирүсийн халдвартай тэмцэх, сэргийлэх талаар цаашид авах арга хэмжээ, А хүрээний H1N1 вирусийн халдварын тархалтыг хязгаарлах, эмнэлгийн тусламж үйлчилгээг үзүүлэх төлөвлөгөөг нарийвчлан хэлэлцлээ.