НИТХ-ын
Тэргүүлэгчдийн шинэ оны анхны хуралдаанаар “Нийслэлийн үйлдвэрлэлийн
салбарт инновацийг хөгжүүлэх дэд хөтөлбөр”-ийг хэлэлцэж баталлаа.
“Монгол
Улсын Засгийн газрын 2007 оны 306 дугаар тогтоолоор батлагдсан
2008-2015 онд Монгол Улсад үндэсний инновацийн тогтолцоог хөгжүүлэх
хөтөлбөрийг үндэслэн нийслэлийн үйлдвэрлэлийн салбарт инновацийг
хөгжүүлэх дэд хөтөлбөрийг боловсруулан гаргаж байгаа нь нийслэлийн бүхий
л салбар болон эдийн засаг, нийгмийн хөгжилд чухал ач холбогдолтой” гэж
тус хөтөлбөрийг боловсруулах ажлын хэсгийн ахлагч, нийслэлийн Засаг
даргын орлогч Д.Ганболд танилцуулах илтгэлдээ онцоллоо.
Нийслэлийн Засаг даргын Захирамжаар байгуулагдсан хөтөлбөр болосруулах ажлын хэсгийнхэн 5 удаа хуралдаж, холбогдох яам, харъяа байгууллагуудаас саналыг нь авч тусгасан байна. Монгол Улсын 2009 оны дотоодын нийт бүтээгдэхүүний 50,5 хувийг нийслэл хот бүрдүүлжээ.
Нийслэлийн эдийн засгийн 68,4 хувийг үйлчилгээний, 30,5 хувийг үйлдвэрлэл, 1,1 хувийг хөдөө аж ахуйн салбар эзэлдэг. Дотоодын нийт бүтээгдэхүүний салбарын бүтцээр манай орны баруун бүсэд хөдөө аж ахуй, хангайн бүсэд үйлдвэрлэл, Улаанбаатарт үйлчилгээний салбар зонхилж байгаа ажээ.
Тиймээс үйлдвэрлэлийн салбарын эзлэх хувь хэмжээг нэмэгдүүлэхэд инноваци ихээхэн хувь нэмэр оруулна гэж үзэж байгаа юм.
Тус хөтөлбөрийг нийслэл хотод шинжлэх ухаан-боловсрол-үйлдвэрлэлийн үр ашигтай уялдаа холбоог хангахуйц инновацийн дэд бүтцийг бий болгох, түүний үйл ажиллагааг тогтворжуулах үе буюу 2011-2012 он, дэд хөтөлбөрт тусгагдсан зорилтуудыг хэрэгжүүлж, хэрэгжүүлэх ажлын төлөвлөгөөнд тусгагдсан ажлуудыг хийж гүйцэтгэсэн байх үе буюу 2012-2016 он гэсэн 2 үе шаттайгаар хэрэгжүүлэх агаад нийтдээ 15 ажил хийж гүйцэтгэхээр төлөвлөжээ.
