МУИС-ийн Олон улсын сэтгүүл зүйн хоёрдугаар курсийн оюутан Б.Дуламхорлоо Монголд зохион байгуулсан англи хэлээр үндэсний аварга шалгаруулах илтгэлийн тэмцээнд түрүүлээд, Лондонд олон улсын илтгэгчдийн “English speaking union” тэмцээнд амжилттай оролцжээ.

-Илтгэх урлаг гэж юу вэ?

-Бид өдөр тутмын амьдралдаа хэлье гэсэн зүйлээ тэр бүр илэрхийлж чаддаггүй. Харин илтгэл тавьж байхад санаагаа хүмүүст хүргэх боломжтой байдаг.

-Яагаад илтгэх урлагаар хичээллэх болов?

-Сэтгүүл зүйн ангид сурдаг учраас ярих чадвар сайтай байх хэрэгтэй. Тиймээс илтгэх урлагийн давуу талыг ирээдүйн мэргэжилдээ ашигладаг. Үүнээс гадна хүнтэй харилцах, зөв хүн болоход хүртэл тодорхой хэмжээгээр нөлөөлдөг гэж боддог.

-Илтгэлээрээ хүмүүст юу хүргэхийг зорьдог вэ?

-Монгол ёс заншил, уламжлал маань алдагдаж, бид эх хэлээрээ хүртэл зөв ярьж, бичиж чадахгүй байна. Жишээ нь, Намуун гэдэг нэрийг Нами гэж дуудах жишээтэй. Ингэснээрээ эх хэл маань эвдэрч, яруу сайхан нь гээгдэж байна. Үүнд сэтгэл эмзэглэж явдаг. Би эх хэл, ёс заншлаа хадгалж үл дэхэд дорвитой зүйл хийнэ гэж боддог.

-Олон улсын илтгэлийн тэмцээний талаар сонирхуулаач?

-Лондонд төвтэй, дэлхийн 60-аад оронд салбартай, ESU гэдэг олон улсын илтгэлийн байгууллага байдаг. Монголд салбар нь бий. Өнгөрсөн дөрөвдүгээр сард болсон үндэсний илтгэх урлагийн уралдаанаас шалгарсан хүүхэд олон улсад өрсөлдөх эрх авсан. Би Лондонд 60-аад илтгэгчтэй өрсөлдөөд, эхний 20-д орсон. Амжилтад хүрэхийн төлөө хайртай хүмүүсээ золиослон байж оргилд гарсан хүн хийсэн зүйлээ эргээд харахаар ямар ч үнэ цэнэгүй болдог та лаар би илтгэл тавьсан.

-Энэ тэмцээнд оролцоход ямар шаардлага тавьдаг вэ?

-Тухайн орондоо илтгэлийн шалгаруулалтад эхний байруудад орсон байх. Тус тэмцээнд англи хэлтэй, 16-20 насныхан оролцдог. ESU миний зардлыг гаргасан. Тус байгууллага Монголд үйл ажиллагаа явуулаад арваад жил болж байна.

-Эх хэлээрээ илтгэл тавибал санаагаа илүүтэй илэрхийлэх бус уу?

-Би өөрийгөө төгс англи хэлтэй гэж хэлэхгүй ч харьцангуй гайгүй шүү. “King`s kids” дунд сургууль төгссөн. Сургууль минь англи хэл сурах асар их бололцоог нээж өгсөн. Мөн “Tse ren tour” компанид 15 настайгаасаа хөтөч-орчуулагчаар ажиллаж байлаа. Намайг жаахан гэж гололгүй ажилд авсан нь хийж бүтээх их урам өгсөн. Гадаад хүнтэй харилцаж, англи хэлний чадвар маань сайжирсан.

-Монгол хүүхэд бусад орны хүүхдүүдээс юугаараа ялгаатай юм шиг санагдсан бэ?

-Монгол хүүхэд дотогшоо ханддаг. Харин гадаадын хүүхдүүд хэлэх гэсэн санаагаа маш их сэтгэлийн хөдөлгөөнтэй илэрхийлж байсан.

-Хэн нэгэн илтгэгчээс үлгэр жишээ авдаг уу?

-Илтгэлийн тэмцээний үеэр Мароккогоос оролцсон хүүхдээр үнэхээр бахархсан. Тэрбээр “Үзэгчдийн таашаалд нийцсэн хүүхэд” шагнал авсан. Дэвшүүлсэн санаа, илэрхийлж байгаа байдал зэрэг нь шинэлэг, содон байсан ч жаахан аялгатай ярьсан нь түрүүлэхэд саад болсон.

-Олон улсын тэмцээнд оролцоод юу сурсан бэ?