Урд хөршийн ченжүүд Монголоос ямаа, адууны мах их хэмжээгээр худалдан авч буй энэ үед хойд хөршийн албаны хүмүүс үхрийн махтай холбоотой судалгаа хийхээр өнгөрсөн долоо хоногт манай улсад ирээд байна. Энэ талаар Мэргэжлийн хяналтын ерөнхий газрын Хүнс, хөдөө аж ахуй, үйлдвэр, үйлчилгээний газрын мал эмнэлгийн хяналтын улсын ахлах байцаагч Д.Батжаргалаас тодрууллаа.
-ОХУ-аас хэдэн хүн ирээд байгаа вэ?
-Хоёр мэргэжилтэн ирсэн. ОХУ-ын Мал эмнэлгийн албаны мэргэжилтэн манай улс шүлхийтэй яаж тэмцэж байна, ямар үр дүн гарч байна вэ гэдгийг судлахаар, Мэргэжлийн хяналтын албаны ажилтан нь Монголын махны үйлдвэрүүдийн хүчин чадал, үйл ажиллагаатай танилцах зорилготой иржээ.
-Оросууд манайхаас ямар малын мах авах юм бэ?
-Үхрийн мах авна.
-Хойд хөршид экспортлохоор үхрийн мах бэлтгэчихсэн байгаа юм уу?
-Манай улсын зарим үйлдвэрийн зооринд ОХУ руу гаргахаар үйлдвэрийн аргаар бэлтгэсэн мах бий. Оросын мэргэжилтнүүд Сэлэнгэ, Дархан-Уул, Ховд аймагт очсон. Улаанбаатар хотын “Мах импэкс”, “Мах маркет”, “Хангай хүнс”ХХК-ийн махны агуулахад нөөцөлсөн махыг үзэж, хаанаас яаж бэлтгэсэн, хэрхэн хадгалж байгаатай танилцан, баримт бичгийг нь харсан. Тус улсад гаргах махаа бид шүлхийгүй бүсээс үйлдвэрийн аргаар бэлтгэсэн, чанар, аюулгүй байдлын шаардлага бүрэн хангасан гэдгийг ойлгуулахыг хичээлээ. Тэд эерэг сэтгэгдэлтэй байна лээ.
-Мах авах эсэх шийдвэрээ хэзээ гаргах юм бол?
-Энэ хүмүүс зөвхөн судалгаа хийж, цаад байгууллагадаа танилцуулах мэдээлэл бэлтгэнэ. Нэг нь өнөөдөр / өчигдөр/ буцлаа. Нөгөө нь маргааш / өнөөдөр/ буцна. Эцсийн шийдвэрийг Москвагийн мал эмнэлэг болон хяналтын албанаас гаргах байх. Тэр шийдвэрт энэ хүмүүсийн танилцуулга нөлөөлөх нь дамжиггүй.
