Одоогийн
байдлаар манайд ДОХ-ын халдвар тээгч болох нь шинжилгээгээр батлагдсан
84 тохиолдол илрээд байгаа билээ. Энэ тоо өчигдөр 85 болох шахжээ. Учир
нь 30 орчим настай, иргэн Т-г нэгэн хувийн лабораторийн эмч ДОХ-ын
халдвартай хэмээн оношлоод ХӨСҮТ рүү явуулжээ. Давтан шинжилгээгээр ямар
ч халдваргүй гэсэн хариу гарчээ. Энэ талаар Т-ээс тодруулахад “Хэд
хоногийн өмнө нэгэн хувийн лабораторид цусны шинжилгээ өгсөн юм. Гэтэл
шинжилгээний хариу ДОХтой гэж гарсан. Намайг ХӨСҮТ-д очиж давтан
шинжилгээ өг гэсэн. Гурав хоног тарчилж, хоолойгоор юу ч давахгүй байсны
эцэст өнөөдөр халдваргүй гэсэн хариу аваад баярлаж сууна” гэв.
-Шинжилгээ өгсөн хувийн лабораторийн эмчдээ хэлсэн үү?
-Хэлсэн. Хувийн лабораториуд анхан шатны тестийн сорилт авдаг тул бидэнд тэр бүр найдаад байх хэрэггүй. ХӨСҮТ-ийн шинжилгээний хариунд л итгэж болно. Манай эмч алдсан байх магадлалтай гэсэн” гэв.
Буруу шинжилгээний хариунаас болж гурав хоног сэтгэлийн зовлон эдэлсэн Т шинжилгээний хариу буруу, дутуу гаргасан хувийн эмнэлгийн нэрийг хэлэхээс татгалзсан юм.
Тэрбээр “Манай хэдэн дарга нар бөөн сенсаац болгоод тэдний үйл ажиллагааг зогсоочихвол яах юм бэ. Би өөрөө л тэднийхийг сонгож очсон. Надаас болж тэд хохирох ёсгүй. Тэд ч бас амьдрах гэж яваа хүмүүс” гэсэн юм.
