Батлан хамгаалахын сайдын тушаалаар бий болгосон “Эх орны төлөө” шагналын эзэд өчигдөр тодорлоо. Цэрэг, иргэний харилцааг бэхжүүлж, батлан хамгаалах салбарын бодлого, зорилго, зорилтыг хэрэгжүүлэхэд онцгой гавьяа, хувь нэмрээ оруулсан иргэн, алба хаагчийг энэ удаа 18 анги байгууллагын 24 иргэнээс шалгаруулсан байна.

Монгол Улсын хөдөлмөрийн баатар, ардын багш, гавьяат хуульч Б.Чимид, ардын жүжигчин, хөгжмийн зохиолч Н.Жанцаннорв, Зэвсэгт хүчний 084 дүгээр ангийн салаан захирагчийн орлогч, бүлгийн дарга, дэслэгч Г.Аззаяа, БХИС-ийн Ахлагчийн сургуулийн дамжааны багш, ахлах ахлагч Ш.Самбуу- Ёндон нар “Эх орны төлөө” шагналын анхны эзэн боллоо.

Б.Чимид багш сүүлийн хоёр жил Батлан хамгаалахын сайдын дэргэдэх Иргэний зөвлөлийн гишүүнээр ажиллахдаа тус салбарын эрх зүйн орчныг боловсронгуй болгох талаар их зүйл хийснээс гадна ЗХ-ний ангиудад цэрэг, эх оронч үзлийн талаар лекц уншсан бол хөгжмийн зохиолч Н.Жанцанноров нийслэл болон орон нутгийн ЗХ-ний ангийн нийт 3500 орчим хүнд “Эх оронч үзэл” сэдвээр хөгжимт лекц уншжээ.

Харин дэслэгч Г.Аззаяа, Ш.Самбуу- Ёндон нар нь 2004 онд Иракт үүрэг гүйцэтгэж явахдаа тэсрэх бөмбөгтэй амиа золиослогчийн террорист ажиллагааг таслан зогсоож, эвслийн цэргийн хүчний олон мянган хүний амийг аварсан гавьяат үйлстэн учир ийнхүү шагналаа.

Батлан хамгаалахын сайд Л.Болд энэхүү дээд шагналын цом, энгэрийн тэмдэг, өргөмжлөл, дагалдах 10 сая төгрөгийг дээрх дөрвөн гавьяатанд гардуулав

www.mongolnews.mn - Эх нутгийн чимээ