Тайваньд зохиогдсон Азийн их, дээд сургуулиудын аварга шалгаруулах IV тэмцээнээс Ш.Сэдбазар, Д.Пүрэвдорж дасгалжуулагчтай Монголын баг хүрэл медаль хүртлээ. Тус тэмцээнд БНХАУ, Хонконг, БНСУ, Монгол, Филиппин, Тайванийн гэсэн зургаан орон өрсөлдсөн бөгөөд манайхны эхний учраа нь Хонконгийн сагсчид байв. Монголын багийн гарааны тавтад О.Сэргэлэн, Ц.Азбаяр, Т.Санчир, Б.Билгүүн, Д.Дэлгэрням нар гарсан бөгөөд “Анхилуун арал”-ынхан эхний гурван үед 16:23, 31:35, 49:51-ээр илүүрхсэн.

Шийдвэрлэх дөрөвдүгээр үе Билгүүний слэм-данкаар эхэлж, улмаар Сэргэлэн дундаас дараалан хоёр удаа оновчтой довтолж, Азбаяр холын зайн шидэлтээ оновчтой болгосноор өрсөлдөгчөө завсарлага авахад хүргэв. Энэхүү тайм-аут тоглолтыг тогтворжуулсан ч манайхан төгсгөлөө чамбай хийж, 73:67- гоор ялалт байгууллаа. Уг тоглолтод Д.Дэлгэрням 12, Б.Билгүүн 20, Т.Санчир 16, Ц.Азбаяр 8 оноо авчээ. Тэмцээний хоёр дахь өдөр залуус маань Азийн шилдэг баг БНХАУ-ын багийг хожиж, Монголын сагсан бөмбөгийн түүхэнд нэгэн шинэ хуудсыг нээлээ.

Дийлэнх тоглогчид нь хоёр метрээс дээш өндөр нуруутай хятадууд эхний хагаст будагтай талбайд илүүрхсэн ч дасгалжуулагч Сэдбазар, Пүрэвдорж нарын тактикийн өөрчлөлт, нүдээ олсон сэлгээ, О.Сэргэлэнгийн ухаалаг дамжуулалтууд амжилтад хүрч, хүчтэй өрсөлдөгчөө 70:67- гоор буулган авах нь тэр. Энэ эрчээрээ хэсгийн гурав дахь тоглолтод Филиппинийг 90:70-аар ялж, медалийн төлөө өрсөлдөх болзлыг биелүүлсэн. Дөрөв дэх тоглолтод адилхан гурван хожилтой БНСУ-ын багтай тоглож, 52:87- гоор дийлдэв. Багийн лидер Т.Санчирыг эхний минутаас тоглуулж ядраахгүйн тулд энэ удаа гарааны тавтад Дэлгэрням, Сэр гэлэн, Азбаяр, Билгүүн, Очирбат нарыг илгээсэн байна. Тоглолт тун өндөр хэмнэлд болж, манайхан эхний хоёр үед ойролцоо тэмцэлдсэн ч гол тоглогчдын нэг Билгүүний хувийн алдаа гурав болж, сэлгээнд суух болсноор оноогоор хоцорч эхлэв.

Гуулин улсын сагсчид жигдхэн олон тоглогчидтой болохоо, багийн тоглолт гэж юу болохыг харуулсаар энэ тоглотод 35 онооны давуутай ялалт байгуулсан. Ингээд алтан медалийн төлөө өрсөлдөх эсэхээ шийдвэрлэх тулааныг талбайн эзэн Тайванийн багтай хийсэн юм. Олон мянган хөгжөөн дэмжигчдийнхээ өмнө тоглож буй тайваньчууд анхнаасаа илүүрхсээр 59:97- гоор энэ тоглолтын ялагч болсон. Ийнхүү арваннэгдүгээр сарын 4-ний ням гаригт Монголын баг хүрэл медалийн төлөө Филиппиний багтай үзэлцэхээр болов. Хэсэгтээ учраа таарахад манайхны эсрэг маш бохир ширүүн тоглож байсан филиппинчүүд энэ удаа нэлээд ширүүн эсэргүүцэл үзүүлэв. Гэвч манайхан аль ч талаар илүү болохоо харуулж 86:78- аар хожин, хүрэл медалийн эзэн болсон юм. Ялангуяа Т.Санчир энэ тоглолтод гойд байж, 13 оноо+9 самбараас бөмбөг авалт+1 оновчтой дамжуулалт гүйцэтгэсэн амжилтаар багийн нөхдөө манлайлав.

МОНГОЛЫН ШИГШЭЭ БАГ

Тоглогчид                                         Хувийн дугаар     Төрсөн огноо     Өндөр      Жин 

 Отгонбаатарын Сэргэлэн                     4                            1989.1.9            175 см      75 кг

Алтантариагийн Энхтүвшин                  5                            1990.7.30           194          85

Баттулгын Батжавхлан                         6                            1989.9.19           181          73

Анхбаярын Бямбадорж                        7                            1992.11.7          190         80

Энхтайваны Цэрэнбаатар                     8                            1990.5.23          198        86

Тунгалагийн Санчир                             9                            1989.4.8             190       87

Баттүвшиний Билгүүн                          10                           1989.3.2            194        88

Готовын Цэнгүүнбаяр                           11                          1990.2.21           194       76

Төмөртогтохын Билгүүн                        12                           1993.6.8            185      78

Цэрэндагвын Азбаяр                            13                           1989.7.16          192     80

Даваасамбуугийн Дэлгэрням                14                           1990.4.8            193     93

Отгонбаярын Очирбат                           15                           1991.2.24          196

- Ахлах дасгалжуулагч: Ш.Сэдбазар