Дуурь бүжгийн эрдмийн театрын тоглолтын хөтөлбөрт гэнэтийн бэлгүүд өөрчлөлт оруулж арваннэгдүгээр сард хоёр том үйл явдал болох гэж байна. Тус театрын тайзнаа ОХУ-ын балетын одод арваннэгдүгээр сарын 2-нд тоглох гэж байгаа. Их, бага театрыг төлөөлсөн шилдэг бүжигчдийн тоглолтын араас ирэх сарын 18-нд Америкийн балетийн театрын гоцлооч, супер од Саша Радецки Монголд ирж А.Аданы “Жизель”-д бүжиглэхээр болжээ.

АНУ-ын балетийн хамгийн алдартай компани болох “Аmerican ballet theatre” энэ сарын 16-нд шинэ улирлын тоглолтоо “Родео” балетаар нээжээ. Метрополитан театрын тайзнаа тоглосон балетийг Саша Радецки гоцолсон юм. Тэрбээр энэ сарын 24-нд Барселонд урилгаар тоглосон бөгөөд ирэх сард манай улсад тоглох боломж тохиожээ.

ДБЭТ-ын 50 жилийн ойн хүндтэй зочдын нэг Саша Радецки “Center Stage” киноны гол дүр болох Чарлигийн дүрээр Холливудад алдаршсан юм билээ. Саша Радецки нь Санта Круз хотод төрсөн бөгөөд 15 настайдаа Москвагийн Большой академид урилгаар очиж суралцсан байна. Түүний багш нь алдарт бүжигчин Пётр Пестов. Дараа нь тэрбээр Америкийн балетийн театрын сонгодог бүжгийн сургуулийг Михайл Баришниковын удирдлага дор төгсчээ. Тэрбээр Жорж Баланшин, Марк Моррис, Пол Тэйлор, Лар Любович, Кеннет Мак Миллан, Твила Тарп, Энтони Тюдор, Жон Кранко, Агнес Де Миль, Жорма Эло, Жероме Роббинс, Энн Рэйнкинг, Кристофер Уйлдон нарын алдартай балетмейстрүүдийн бүтээлд ихэвчлэн тоглодог гэнэ. Түүнчлэн саяхан “Хар хун” киноны бүжиг дэглээч Бенжамин Миллепидийн уран бүтээлийг тэр амилуулжээ.

Энэ арга хэмжээний ерөнхий зохион байгуулагчаар АНУ-ын “Blue Silk Travel” компани ажиллаж байна.