Монгол Улс аюулгүй байдлын бүс нутгийн хамгийн том хуралд оролцож байна
Уншсан 6742 vote 0 2011.12.08 14:31:37
Литва Улсын нийслэл Вильнюс хотноо энэ сарын 6-7-нд болсон Европын аюулгүй байдал, хамтын ажиллагааны байгууллага (ЕАБХАБ)- ын Гадаад хэргийн сайд нарын 18 дугаар бага хуралд Гадаад харилцааны сайд Г.Занданшатар тэргүүтэй Монголын төлөөлөгчид оролцлоо. Тус байгууллагын оролцогч 56, хамтын ажиллагааны түнш 12 улс болон олон улсын зарим байгууллагын төлөөлөл оролцсон энэхүү бага хурлыг Литва Улсын Ерөнхийлөгч хатагтай Далиа Грибаускайте нээж, хуралд оролцож байгаа улс орнуудын төлөөлөгчдөд болон хурлын үйл ажиллагаанд амжилт хүсэв.
Монгол Улсын Гадаад харилцааны сайд бага хурлын эхний өдөр Монгол Улсын гадаад бодлого, ЕАБХАБ-тай амжилттай өргөжин буй харилцаа, хамтын ажиллагааны талаар танилцуулж, 2004 онд тус байгууллагын Азийн түнш (ажиглагч) орон болсноор амжилттай хамтарч ажиллаж ирсэн Монгол Улс одоо тус байгууллага болон түүний гишүүн улсуудтай хамтын ажиллагааныхаа төвшинг ахиулж оролцогчийн (гишүүний) төвшинд хүргэх сонирхолтой байгааг мэдэгдэв.
Тэрбээр ЕвроАзийн бүс нутагт аюулгүй байдлын нэгдмэл орон зайг тогтооход үйл ажиллагаагаа чиглүүлэн, аюулгүй байдлын асуудлыг цэрэг-улс төрийн, эдийн засаг- байгаль орчны ба хүний гэсэн гурван орчинд авч үзэж, нийтийн зөвшилцөлд тулгуурлан шийдвэр гаргадаг тус байгууллагад нэгдэн орох нь Монгол Улсын ашиг сонирхол, гадаад бодлогын үзэл баримтлалд бүрэн нийцэхийн дээр Монгол Улс тус байгууллагыг эрхэм зорилтдоо хүрэхэд нь газар зүйн байршлын давуу тал, нийгмийн гүн гүнзгий өөрчлөлт хийж байгаа туршлагаасаа хуваалцах замаар өөрийн хувь нэмрийг оруулах болно гэж цохон тэмдэглэв гэж ГХЯ-ны Олон нийттэй харилцах газраас мэдээлэв.
