Төрийн шагналт зураач С.Саранцацралыг эргэж харалгүй өнгөрдөг хүн ер нь байдаггүй болов уу. Бусдаас ялгарч чаддаг түүний өвөрмөц имиж, үс болон нүүр будалт, өнгө донж. Өөр нэгэн чухал зүйл бол цаанаа л гэрэлтэй ялдам инээмсэглэл. Энэ бүхэн олны харцыг эрхгүй татдаг биз. Зарим хүн түүнийг дэндүү гаж, содон гэх нь бий. Нөгөө хэсэг нь уран бүтээлчийн сэтгэлгээг дүр төрхөөрөө донжтой илэрхийлж чаддаг гэдэг. Гаднынхны хувьд түүний стиль, гадаад байдал манайхны ярьдаг шиг тийм аймаар биш, энгийн л зүйл.

Харин аливаа зүйлийг эсрэг, эерэг хоёр туйл дээр аваачиж хэтрүүлэх гээд байдаг монгол сэтгэлгээ түүнд “аймаар, гаж” гэсэн зохимжгүй гэж ярихад хүргэсэн байх. Монголын уран зургийн ертөнцөд тод мөртэй, Төрийн шагналт энэ эрхэмсэг эмэгтэйг Их Британийн Кембрижийн их сургуулийн дэргэдэх Олон улсын намтар судлалын төвөөс “Дэлхийн оюунлаг хүн”-ий нэгээр тодруулсан сайхан мэдээ байна.

Тус төвийн шинжээчдийн судалгаа, үнэлэлт, дүгнэлтэд суурилан дэлхийн хэмжээний 2000 хүнийг шилдгээр шалгаруулан эл шагналыг олгодог онцлогтой юм билээ. Тэдгээр хүний намтраас бүтсэн номыг олон улсын түвшинд хүлээн зөвшөөрөгдсөн шилдэг их, дээд сургуулиудын номын санд байрлуулдаг аж. Шагналаа гардаж аваад удаагүй байгаа түүнтэй холбогдлоо.

-Сайн байна уу, олон улсын хэмжээнд тодруулдаг том шагнал хүртсэнд тань “Өнөөдөр” сонины уншигчид болон хамт олныхоо өмнөөс баяр хүргэе. Энэ шагналыг өмнө нь монгол хүн авч байсан болов уу?

-Баярлалаа. Их Британийн Кембрижийн их сургуулийн дэргэдэх Олон улсын намтар судлалын төв “Дэлхийн оюунлаг хүн” шагналын эзнийг тодруулахдаа тухайн хүний уран бүтээл, нийгэмд эзлэх байр суурь зэрэг олон үзүүлэлтийг харгалзан үздэг гэсэн. Байгууллагынхаа шинжээчдийн судалгаанд үндэслэн шагнадаг юм шиг байна билээ. Монголоос өмнө нь техникийн ухааны доктор Г.Лхагваа гуай болон өөр хэдэн хүн мөн энэ шагналын эзэн болж байсан гэж сонссон.

-Энэ шагналд Монголын талаас тодорхойлж өгдөг юм болов уу, эсвэл зөвхөн цаад байгууллагын судалгаанд үндэслэн тодруулдаг уу?

-Миний сонссоноор Олон улсын намтар судлалын төв гэдэг тухайн байгууллагын шинжээчдийн судалгаа, дүгнэлтэд тулгуурладаг гэсэн. Монголоос тодорхойлж өгсөн, эсэхийг сайн мэдэхгүй байна. Уучлаарай, би өнөөдөр (өчигдөр) орой гадагшаа явах гээд жаахан зав мууутай байна. Ирэх оны нэгдүгээр сарын дундуур ирнэ. Тэр үед уулзацгаая.