Өнгөрсөн
пүрэв, баасан гаригт БНСУын Жэжү хотноо жүдо бөхийн Дэлхийн цомын
тэмцээн боллоо. Тус тэмцээнд 16 орны эрэгтэй 97, эмэгтэй 64, нийт 161
бөх өрсөлдсөн юм. Газар нутаг ойролцоо болсон тус тэмцээнд манайхан 21
эрэгтэй, 13 эмэгтэй тамирчин бүхий нүсэр бүрэлдэхүүнтэй оролцжээ. Манай
тамирчид нэг алт, хоёр мөнгө, долоон хүрэл медаль авсан амжилтаар багийн
дүнгээр гуравт бичигдсэн байна. Улсын өсөх идэр начин, ОУХМ Э.Энхбат
энэхүү тэмцээнд жин өгсөн -100 кг-д зодоглож, багийнхаа ганц алтан
медалийг авчирсан.
Манай бөх гурван солонгос, нэг Тайванийн бөхийг дараалан ялж, аваргалсан юм. Шигшээ барилдаанд гэхэд дэлхийн аварга Хван Хэ-Тэг цэвэр савжээ. Харин 66 кг-д зодоглосон Д.Төмөрхүлэг Оросын И.Спиринийг цэвэр, БНСУ-ын Хван Бо-Баэ, Чо Жүн-Хо нарыг юүкогоор ялж, финалд үлдээд Японы бөх, 2010 оны дэлхийн аварга Ж.Моришитад цэвэр ялагдсан байна. Түүнчлэн эмэгтэйчүүдийн 63 кг-д хүч үзсэн залуу тамирчин Балдоржийн Мөнгөнчимэг мөнгөн медалийн эзэн болсон юм. Тэрбээр эзэн орны Ким Сөл Ги, Канадын П.Баухемин нарыг цэвэр ялж, шигшээд үлдээд Японы К.Санод иппоноор дийлдсэн юм. Түүнчлэн эрчүүдээс Д.Баярмагнай (60 кг), Г.Болдбаатар (60 кг), Х.Цагаанбаатар (81 кг), Ө.Дүүрэнбаяр (+100 кг), Х.Мөнхбаатар (+100 кг), эмэгтэйчүүдээс А.Цолмон (52 кг), Ц.Наранжаргал (70 кг) нар хүрэл медалийн эзэн болсон байна.
Олимпийн
хүрэл медальт С.Ням-Очир дээд жиндээ барилдаад эхний даваанд Японы
Г.Марүямад ялагдсан байна. Дэвжээний эзэн солонгосчууд нийт 54 тамирчнаа
оруулж, 25 медаль авсан. Гэхдээ медалийнхаа чанараар Япон тэдний өмнө
гишгэжээ. Япончууд 17 тамирчинтай ирээд найман алт, хоёр мөнгө, дөрвөн
хүрэл медаль хүртсэн юм. Нийтдээ долоон орны тамирчид л медаль дээр
буужээ.
МЕДАЛЬ АВСАН ОРНУУД
Улс Алт Мөнгө Хүрэл Нийт
1.Япон 8 2 4 14
2.БНСУ 4 10 11 25
3.Монгол 1 2 7 10
4.БНХАУ 1 - 1 2
5.ОХУ - - 3 3
6.Тайвань - - 1 1
7.Канад - - 1 1
mmmmmmm