Байгаль орчны тухай мэдээллээр иргэдийг хангах, энэ чиглэлээр шийдвэр гаргахад тэднийг оролцуулах, зөрчигдсөн эрхийг нь сэргээх зэрэг асуудлыг тусгасан Аархусын конвенцийг 1998 онд Дани улсад болсон Европын холбооны улсуудын сайд нарын IV хурлаар баталжээ. Одоо энэ Конвенцид 44 улс нэгдээд байгаа юм байна. Монгол Улс ч түүнд нэгдэх нь зүйтэй гэж манай Засгийн газар үзэж буй аж. Чухам энэ асуудлыг Улаанбаатар хотноо хоёр өдөр үргэлжилсэн “Байгаль орчны асуудлаар мэдээлэл авах шийдвэр гаргахад оролцох тухай” сэдэвт зөвлөлдөх уулзалтаар ярилцав.

Уг арга хэмжээг Монгол Улсын Ерөнхийлөгчийн санаачилгаар зохион байгуулжээ. Нутаг дэвсгэр нь баялагтайн улмаас олз ашгийн хойноос хөөцөлдсөн гадаад, дотоодын компанийнхны “халдлагад” өртөөд байгаа Увс, Говь-Алтай, Өвөрхангай, Өмнөговь, Сэлэнгэ, ДарханУул, Дорноговь, Дорнод, Завхан, Сүхбаатар зэрэг аймгаас хүмүүс ирж зөвлөлдөх уулзалтад оролцсон байна. Энэхүү Конвенц дэлхий дахинд тулгараад байгаа агаар, усны бохирдол, цөлжилт, байгаль орчны сүйрлийг бууруулахад улс орнуудын хамтын оролцоо, хариуцлагыг нэмэгдүүлж, байгаль орчны хийгээд хүний эрхийн хамгаалалтыг давхар бий болгож чадсан хэмээн НҮБын Ерөнхий нарийн бичгийн дарга Бан Ги Мүн нэгэнтээ үнэлжээ.