Нийслэлийн хэмжээнд тарваган тахлаас сэргийлэх нэгдсэн арга хэмжээ зохион байгуулахаар болжээ. Энэ талаар нийслэлийн Цагдаагийн газрын Хэв журмын хэлтсийн ахлах байцаагч, хошууч Ж.Амгалангаас тодрууллаа.

-Тарваган тахлаас сэргийлэх нэгдсэн арга хэмжээг хэрхэн зохион байгуулах талаар мэдээлэл өгөөч?

-Нийслэлийн Засаг даргын 2011 оны долдугаар сарын 20- ны захирамжаар тарваган тахал өвчнөөс урьдчилан сэргийлэх нэгдсэн арга хэмжээг энэ сарын 27-ноос аравдугаар сарын 15 хүртэл зохион байгуулахаар болсон.

-Энэ арга хэмжээнд хэчнээн байгууллага оролцож байгаа вэ?

-Нийслэлийн Цагдаагийн газар, Замын цагдаагийн газар, нийслэлийн Онцгой байдлын газар, Эрүүл мэндийн газар, Мэргэжлийн хяналтын газар, Байгаль орчны газар, Иргэний нисэхийн ерөнхий газар, Монгол, Оросын хувь нийлүүлсэн Улаанбаатар төмөр зам нийгэмлэг хамтран ажиллах юм.

-Нийслэлд гаргасан хяналт шалгалтын цэгүүд хаагуур байрлаж байгаа бол. Нууц биш бол энэ талаарх мэдээллийг өгөөч?

-Эмээлт, Налайх дүүргийн “Цайз трейд”, Баянзүрх дүүргийн товчоо, 22-ын товчоо, Хэрлэнгийн гүүр, Яармаг, Нисэх, Биокомбинатын шалган нэвтрүүлэх, бүртгэх товчоодод цагдаа, мэргэжлийн хяналтын байгууллага, Замын цагдаагийн газрын ажилтнууд 24 цагаар гурван ээлжээр ажиллаж байна. Байгалийн голомтот халдварт өвчин судлалын үндэсний төв мөн өндөржүүлсэн байдалд байгаа.