Дэлхийн хамгийн халуун цэгүүдэд болж байгаа үйл явдлыг цаг минут
алдалгүй хүн төрөлхтөнд хүргэж байдаг мэдээллийн СNN агентлагийн баг
Монгол Улсад ажиллаж байна. “Prism” хэмээх мэдээллийн нэвтрүүлгээрээ
нэрд гарч, Ирак, Афганистан, Пакистаны дайн, Тайландын жагсаал цуглаан,
цунами, Пакистаны газар хөдлөлт зэрэг үйл явдлыг газар дээрээс нь
сурвалжилж байсан, олон улсын тоймч, СNN-ийн нүүр царай, нэрт сэтгүүлч
Стэн Грант энэ удаа дэлхийн үзэгчдийн анхаарлыг монголчууд руу хандуулах
гэж байна.
Монгол Улсын Ерөнхийлөгч Ц.Элбэгдоржтой Стэн Грант өчигдөр уулзаж, дэлгэрэнгүй ярилцлага хийсэн байна. Ерөнхийлөгчийн намтар түүх, улс төрийн амжилт, хийж хэрэгжүүлж буй бодлого үйл ажиллагаа, ардчилал хүний эрхийг хангахын төлөөх түүний зүтгэл зэрэг сэдвээр ярилцахын зэрэгцээ, дэлхий нийтийн анхаарлыг татаж буй Монголын уул уурхайн баялгийг хэрхэн зөв ашиглах, эдийн засгийн өсөлт, гурав дахь хөршийн бодлого зэрэг хүрээнд тэд ярилцжээ.
