Монгол орны 17 аймгийн 96 суманд өвөлжилт хүндрэв. Өнөөдрийн байдлаар нийт нутгийн 90 гаруй хувьд нь цасан бүрхүүл тогтсоноос зарим хэсэгт 20-58 см мөсөн давхарга үүсчээ. Тухайлбал, Увс аймгийн Наранбулаг, Малчин, Хяргас, Сагил, Түргэн, Завхан аймгийн Баянхайрхан, Тэлмэн, БаянУул, Их-Уул, Тосонцэнгэл, Яруу, Хөвсгөл аймгийн Хатгал, Улаан-Уул, Дорнод аймгийн Сэргэлэн, Сүхбаатар аймгийн Халзан, Дарьганга, Эрдэнэцагаан, Өвөрхангай аймгийн Хужирт, Бат-Өлзий, Уянга, Хайрхандулаан суманд цасны зузаан 20- 100 см-т хүрсэн аж.
Харин Баян-Өлгий, Хэнтий говийн аймгийн зарим нутгаар цасгүй “харын зуд” үргэлжилж байна. Иймээс малчид малаа онд оруулахын тулд зэргэлдээх аймаг, сумд руу оторлож буй гэнэ. Өвөлжилт хүндэрсэн аймгуудад цасны зузаан төдийлэн нэмэгдээгүй ч хүйтний эрч чангарч, Говь-Алтай аймгийн Бугат, Өвөрхангай аймгийн Хархорин, Өмнөговь аймгийн Булган, Гурвантэс суманд 16-24 м/с хүрч шуурчээ.
Түүнчлэн Говь-Алтай аймгийн Дэлгэр, Тайшир суманд 380 гаруй мал хорогдоод байна. Ялангуяа Дэлгэр суманд өвөлжилт хүндэрч мал олноороо хорогдох болсон хэмээн аймгийн Онцгой байдлын хэлтсээс мэдээлэв. Өвөрхангай аймагт байдал хүндэрч хойд сумдын зам, даваа хаагджээ.
Энэ талаар тус аймгийн Онцгой байдлын хэлтсийн дарга, дээд ахмад Т.Энхбаатараас тодруулахад “Өвөлжилт хүнд байна. Бат-Өлзий, Хужирт, Зүүнбаян-Улаан, Хархорин, Есөнзүйл, Өлзийт, Бүрд суманд цас ихтэй байгаа учраас машин явах боломжгүй болж зам, даваанууд хаагдсан. Дор бүр нь цэвэрлэж байгаа ч цас байнга орж байгаа учир нэмэргүй байна.
Есөнзүйл суманд “Газ-66” машинаар өвс тэжээл хүргэж, түргэн тусламжийн үйлчилгээ үзүүлж эхэлсэн. Одоохондоо нөөцөд өвс тэжээл хангалттай бий.
Өнөөдрийн байдлаар хорогдсон мал байхгүй” гэв. Өвөлжилт хүндэрсэнтэй холбогдуулан Өвөрхангай аймаг дахь Улсын нөөцийн салбар нэгжүүдэд байршуулах шаардлагатай 600 тн өвсийг тээвэрлэхэд зориулж 56 сая төгрөг, дизель станц ажиллуулахад 60 сая төгрөг, нийт 116 сая төгрөгийг Засгийн газрын нөөцөөс гаргаж, мөн Дорноговь аймгийн Хатанбулаг сумын эвдэрсэн дизель станцыг солихоор болжээ.
