Мэргэжлийн
сүмогийн 70 дахь ёкозүна Харүмафүжи энэ сарын 18-нд Токио хотын Япон
дахь гадаад сэтгүүлчдийн клуб (The Foreign Correspondents' Club of
Japan)-т зочлон, гадаад сэтгүүлчдийн сонирхсон асуултад хариуллаа. Япон
сэтгүүлчдийн барагтай бол асуудаггүй хурц, сонирхолтой олон янзын
асуултанд Харүмафүжи торох юмгүй хариулж байсан нь олны талархлыг ихэд
хүлээжээ. Ингээд цаг хагас орчим үргэлжилсэн ярилцлагаас түүвэрлэн
хүргэе.
Америкийн сэтгүүлч: Ёкозүна цолтой анх барилдсан тэмцээндээ есхөн ялсан таныг хэвлэл мэдээллээр шүүмжлэн “Аварга цол авах хүн биш байж” гэх зэргээр хэлж байсан. Тэр үед юу бодож байв?
-Өөрийгөө дайчлан барилдаад ес ялсан болохоор энэ маягаараа дахиад бүх чадлаа дайчлан барилдаад байхад амжилт заавал ирнэ гэж бодож байлаа.
Герман сэтгүүлч: Хөлбөмбөгт эсрэг багийнхаа тоглогчид, тактикийг судалдаг. Сүмод барилдах өрсөлдөгчөө хэр судалдаг вэ?
-Сүмод толгой эсвэл цээжээрээ мөргөлдөн золгохоос өөр арга байдаггүй. Тийм болохоор өрсөлдөгчийнхөө золгон босдог арга, тактикийг нь судалдаг.
Бразил сэтгүүлч: Өдөрт хэдэн калорийн илчлэгтэй хоол иддэг вэ?
-Дуртай хоолоо ямар ч хориггүй, хүссэн хэмжээгээрээ иддэг.
Герман сэтгүүлч: Одоогийн залуус сүмо бөхчүүдийг сайхан гэж бодож байгаа болов уу? Өмссөн хувцас, амьдралын хэв маяг гээд залуучуудад таалагддаггүй гэж бодох юм.
-Эрт одоо аль ч цагт сүмо бөхчүүдийн нандигнан хадгалж, дагаж мөрдөж явдаг зүйл бол сүмо бөхийн ёс заншил. Цаашдаа ч тийм байх болно.
Англи сэтгүүлч: Японд гадаадын иргэд, цагаачдын асуудал хурцаар тавигддаг. Гадаадаас ирсэн та ёкозүна цол хүртээд өөрийгөө Японы нийгэмд хүлээн зөвшөөрөгдсөн гэж бодож байна уу?
-Гадаад орноос ирсэн ч гэсэн хүлээн авч, ирээдүй, мөрөөдөл олгосон Сүмогийн холбоонд үнэн сэтгэлээсээ баярлаж явдаг.
Хятад сэтгүүлч: Зодог тайлсан Асашёорюүд хэт хатуу шийтгэл оноосон гэж бодож байна уу?
-Хэрэг хийсэн болохоор хариуцлагаа хүлээх нь мэдээжийн зүйл шүү дээ.
Франц сэтгүүлч: Япончууд ёкозүна болж чадахгүй байгаагийн учир юунд байна?
-Үхэхээс буцахгүй тэмцэж, зүтгэж байгаад озэки болж чадна. Харин ёкозүна болно гэдэг хувь заяа гэж боддог. Гэхдээ энэ бол зөвхөн миний хувийн бодол шүү.
