Дотоодын цэргийн алба хаагчид Улаанбаатар хотын ус хангамжийн эх үүсвэрийг хамгаалах үүрэг гүйцэтгэдэг. Уг эх үүсвэрийн нэг Тасганы овоон дахь усан сангийн харуулын цэгт үүрэг гүйцэтгэж байсан Дотоодын цэргийн 805 дугаар ангийн харуулчин, ахлах ахлагч Б.Алтангэрэл, дэд ахлагч Ч.Анхбаяр нар хамгаалж буй объектынхоо орчимд үзлэг хийж яваад энэ сарын 14-ний 03.50 цагийн үед айлын байшин шатаж байгааг харжээ.

Дээрх усан сангийн хашааны шалган нэвтрүүлэх хаалганы эсрэг талд байрлах, Чингэлтэй дүүргийн VIII хороо, Усны III гудамжны 0043 тоот хашаан дахь хоёр давхар, 8х6 хэмжээтэй байшин дээврээсээ эхлээд шатаж байжээ. Дотоодын цэргийн дээрх хоёр алба хаагч Шуурхай удирдлагын төвийн 101 дугаарын утсанд гал гарсан талаар дуудлага өгөөд, өөрсдөө тэр айл руу очжээ.

Улмаар ахлах ахлагч Б.Алтангэрэл хашааг нь даван орж, гэрийн эзэд болох зургаан хүнийг сэрээн, гаргаж, амь насыг нь аварчээ. Тэд гал сөнөөгчдийг иртэл байшинд гарсан галыг унтраах бололцоотой арга хэмжээ авсан бөгөөд Гал унтраах 10 дугаар ангийнхан удалгүй ирж галыг унтраасан аж.