академийн залуу багш Б.Отгонтүвдэнтэй энэ сарын 26-ны 20.00 цагт
чаатлалаа. Залуу зураач энэ жил уран бүтээлийн арвин ургац хураан авч,
үр шимийг нь олон нийтэд, тэр бүү хэл, хил дамнуулан танилцуулж байна.
Тодруулбал, тэрбээр өнгөрсөн сард БНХАУ-д, энэ сард ОХУ болон Монгол
Улсад үзэсгэлэнгээ гаргаж, бүтээлээ танилцуулж байгаа юм. Түүний
“Сэтгэгдэл” нэртэй үзэсгэлэн маргааш “976” галерейд нээлтээ хийнэ.
-Сайн байна уу. БНХАУ-д гарсан Таны үзэсгэлэн хэзээ өндөрлөх вэ. ОХУ-д энэ сарын 23-нд шинэ үзэсгэлэн нээсэн гэв үү?
-Өнгөрсөн сарын 28-нд Шанхайн “СанктПетербург” галерейд миний 50 гаруй бүтээлийг дэлгэсэн үзэсгэлэн нээгдсэн. Ихэвчлэн байгалийн дүрслэл, үйл явдал харуулсан зураг орсон юм. Мөн энэ сарын 23-нд ОХУ дахь Монгол Улсын Элчин сайдын яамны байранд нэг үзэсгэлэн нээсэн. Би энд ажил ихтэй байгаа учраас БНХАУ болон Монголд нээж байгаа үзэсгэлэндээ өөрөө оролцож амжааг үй. Харин ОХУ-д гарсан үзэсгэлэнгийнхээ нээлтэд оролцчихоод өчигдөр Санкт-Петербургт ирлээ.
-Өнгөрсөн зун “Цагаан дариум” галерейд анхны үзэсгэлэнгээ нээхээр Монголд ирж байсан. Түүнээс гадна монгол хүн И.Е.Репиний академид багшилж байгаа гэсэн мэдээгээр биднийг баярлуулаад буцсан шүү дээ.
-Одоогоор би туслах багш учраас нэг, хоёрдугаар курсын оюутнуудад хичээл заадаг. Энэ академид ажиллах эхний гурван жилдээ бүтээлийн урланд байж 1-2 үзэсгэлэн гаргаж, багш нартаа тайлан тавих учиртай. Мөн энэ жил манай урланд зургадугаар курсээ төгсөгч оюутнуудын дипломын шүүмжлэгч багшаар намайг томилсон.
-Энэ академид суралцах бас багшлах боломж хүн бүрт олдохгүй шүү дээ. Гэтэл та шууд гуравдугаар курсээс нь суралцаж эхэлсэн байх юм.
-Аз таарсан хэрэг.
-Гэхдээ Таныг ингэж онцлох шалтгаан байсан байж таарна.
-ОХУ-ын аль ч хотод дүрслэх урлагийн мэргэжлээр төгссөн хүмүүс И.Е.Репиний академид шалгалт өгч, нэгдүгээр дамжаанаас нь сурдаг. Харин манай сургуулийн захирал болон тэнхмийн эрхлэгч нар миний бүтээлийг үзээд намайг гуравдугаар дамжаанаас суралцуулахаар шийдсэн.
-Багаасаа бурхан зурдаг байсан гэж ярьсан байсан. Бас нэр чинь ч содон юм. Танай гэр бүлд зураач хүн байсан уу?
-Манай дунд ах Түвдэн Дүрслэх урлагийн сургуульд сурдаг, бас сайн зурдаг байсан ч амьдралын эрхээр уран бүтээлээсээ хөндийрсөн. Мөн миний өвөө их сайхан зурдаг лам хүн байсан гэсэн.
-ОХУ-ын дүрслэх урлагийн салбар Монголынхоос ямар ялгаатай вэ?
-Бодит уран зураг голлодог. Түүнээс биш үзэсгэлэн гаргах, бүтээлээ зах зээлд нийлүүлэх гээд бусад талаараа ижилхэн.
-Хэзээ эх орондоо ирж ажиллах вэ?
-Ойрын
хэдэн жилдээ эндээ байх болов уу. Цаашид Монголдоо очиж, Дүрслэх
урлагийн сургуулиа энэ академитай холбож оюутан солилцуулах, зураач
нарын үзэсгэлэнг ОХУ-д зохион байгуулах гэх мэтээр гүүр болж ажиллахыг
хүсэж байна.
