Байгаль дэлхий өнгөө хувилган, өвлийн хүйтэн амьсгал хэдийнэ орсон нь хувцас загварын шинэ улирал эхэлж буйг сануулсан хэрэг. Тэгээд ч дэлхийн тэргүүлэгч загварын Ордонууд 2009 оны өвлийн хувцас загварын чиг хандлагыг илэрхийлсэн үзүүлбэрүүдээсээ элж дараалан толилуулсаар байна. Энэ өвлийн улирлын хувьд гол онцлог нь нягт нямбай байдал, алтан дунджийг барих. Ямар ч эрс тэс шинэлэг зүйл, санаа хэрэггүй. Ихэнх дизайнеруудын хувцас загварын шийдэлд дал, наяад оны хиппи, ретро чиг хандлага давамгайлсан харагдана. 2009 оны өвлийн бараг бүх загварт уламжлалт сонгодог хэв маяг голлосон байх бөгөөд энэ нь ямар ч орчин, нөхцөл байдалд эвтэй, тухтай байхаар аж. Энэ бүгдийг дизайнерууд жижиг деталь, аксессуараар чимэглэж өгчээ. Сэвсгэр үслэг хүрэм Өвөл мэдээж хүйтэн байх тул дулаахан хувцасны тухай бодох хэрэгтэй болдог. Энэ өвлийн улирлын хувьд дизайнерууд амьтан хамгаалагчдын эсэргүүцлийг үл хэрэгсэн жинхэнэ натурал үс, ангийн үслэг арьсыг сонгожээ. Үслэг хүрэмний тансаг, дур булаам байдлыг юутай ч зүйрлэх аргагүй юм. Энэ улирлын гол хандлага нь урт сортой үнэг, хярсны арьсан хүрэм болж байна. Гэхдээ сэвсгэр чанар, хэмжээ хоёрыг тэнцүүлсэн байгаа нь ажиглагдана. Газар шүргэсэн урт хоромойтой бус харин богино үслэг жакет, хагас богино урттай шуб, урт сортой үслэг арьсан оруулагатай урт пальто, куртка дагнажээ. Энэ нь өнөө цагийн хотын офисжсон орчинд илүү тохиромжтой харагдах юм. Ханцуйгүй загварууд Ангийн үслэг эдийг дизайнерууд энэ жилийн бусад төрлийн загваруудад тун овжин ашиглажээ.

2009 оны өвлийн хувцасны загварын үзүүлбэрүүдэд бэлхүүс хүрсэн урттай богино хантааз бас тосгоны стильтэй, хөлийн булчин шүргэсэн урттай ханцуйгүй жилет бүхий загварууд ноёлох хандлагатай байна. Илүү сонгодог хэв маягийг хадгалсан сүлжмэл ханцуйгүй жакет нь эрчүүдийн гардеробт хүндтэй байраа олжээ. Энэ улирлын хувьд гол хит болсон загварууд нь үслэг эдэн богино хүрэм эсвэл ангийн үсэн оруулга эмжээр бүхий жакетууд юм. Ороолтны сонголтын хувьд … Дизайнерууд урт хүзүүний ороолт, сүлжмэл даавуун малгайг энэ өвөл санал болгож байна. Энэ улирлын онцлог нь тэд элдэв этгээд сэтгэмж шийдлээсээ татгалзан, энгийн хийц маягийг голчилжээ. Маш урт, сэвсгэр том хүзүүний ороолт өнгөрсөн өвөл ноёрхож байсан бол энэ өвөл хүзүүгээ нэг, хоёр л ороохоор, үзүүр нь урт унжсан, нимгэн сүлжмэл даавуун ороолт орыг эзлэх нь. Энэ улирлын хит болсон загвар нь дулаан гэхээсээ илүүтэй гоёлын зориулалт бүхий торгон ороолт юм байна. Харшсан өнгөтэй бол хоёрыг хослуулан зүүсэн ч болох гэнэ.

Банана өмд Ороолт, ангийн үсэн хантаазыг та дулаан өмдтэй хослуулан өмсч болно. Харин энэ өвөл яг ямар загвартай өмд хит болж байгаа юм бол? Энэ жилийн хит загварын өмд эмэгтэй хүн бүрт зохино гэж хэлэх хэцүү. Учир нь наяад оны банана загварын өмднүүд эргэж ирж байгаа аж. Гэхдээ тааз орчим маш өргөн харин доошоо бариу. Зарим дизайнерууд шагай хүрсэн урттайг санал болгож буй бол нөгөө хэсэг нь эмжээртэй эсвэл өвдгөөр урттай загварыг илүүд үзжээ.