Оюутолгой төслийн баяжуулах үйлдвэрийн үйл ажиллагаа эхлэхэд долоо хоног үлдэв. Ганц гозойх шонгүй байсан өмнийн говийн хоосон талд өдгөө томоохон бүтээн байгуулалт сүндэрлэн босоод буй. Өнгөрсөн хоёр жил хагасын хугацаанд ил уурхай, баяжуулах үйлдвэрийг барьж дууссаны зэрэгцээ олон улсын стандартад нийцсэн нисэх онгоцны буудал барьж, гүний ус зөөх 70 км урт хоолой, өмнөд хөршөөс хил дамнуулан 180 км урт цахилгааны шугам татсаныг дурдаж болно.

Эдийн засгийн үр ашгийн хувьд 2010 оноос хойш манай улсад 803 сая ам.долларын татвар төлж, үндэсний компаниудаас 1.1 тэрбум ам.долларын бараа бүтээгдэхүүн, үйлчилгээ авчээ. Түүнчлэн Өмнөговь аймгийн жижиг, дунд бизнес эрхлэгчдийг дэмжих зорилгоор нэг сая ам.долларын сан бүхий зээлийн төсөл хэрэгжүүлж, нийгэм, эдийн засгийн хөгжилд зориулан 10 сая ам.доллар хандивласан байна.

Гаднын компаниуд уг төсөлд оруулсан хөрөнгөө эргүүлэн олж авах үед манай Засгийн газар хэдийнэ 7-8 тэрбум ам.долларын ашиг хүртсэн байх тооцоо гаргажээ. Бүтээн байгуулалтын оргил үед “Оюутолгой” төсөлд 44 орны 15000 орчим хүн ажиллаж байсны 11000 нь монголчууд байсан бол, одоогоор 3000 орчим хүн ажиллаж байгаа талаар тус компанийн Ерөнхийлөгч Камерон МакРей өчигдөр хийсэн хурлын үеэрээ танилцуулав. “Нарны гүүрийг япончууд гурван жил барьсан. Харин энэ том бүтээн байгуулалтыг хоёр жил хагаст барьж дуусгасан нь дэлхийд гайхагдаж буй. Энэ хугацаанд хамгийн сүүлийн үеийн туршлага, технологийн ололт дэвшлийг ашигласан. Нөгөө талаар гадаадын хөрөнгө оруулагчдад Монголын зах зээл, ирээдүйн хөгжилд хувь нэмэр оруулах итгэл найдварыг бид бий болгож байгаа. Энэ бол том амжилт” хэмээн тэрбээр онцлов.