Олон улсын жүдо бөхийн холбоо (IJF)-ноос дүрмийн өөрчлөлт хийснээ зарлалаа. Үүнд тэмцээн зохион байгуулах дүрэм, шүүлт болон чансаа тогтоох шинэ дүрэм гаргажээ. Тэмцээн зохион байгуулах дүрэм болон шинэ шүүлтийг 2013 оны хоёрдугаар сард Францын Парис хотноо болох Их дуулгын тэмцээнээс 2013 оны наймаас есдүгээр сард Бразилийн Рио-де-Жанейрод болох ДАШТ хүртэл туршилтын журмаар хэрэгжүүлж үзэх юм. Олон улсын холбооноос зохион байгуулж байгаа албан ёсны тэмцээнүүд буюу ДАШТ, тивийн аваргын тэмцээнд бүх насны ангилалд дээд тал нь есөн эрэгтэй, есөн эмэгтэй тамирчин оролцож байхаар болсон. Урьд нь эрэгтэй, эмэгтэй тус бүр 14 тамирчин орж болдог байлаа. Өөрөөр хэлбэл нэг улсаас бүх жинд хоёр бөх оролцож болдог байсан бол одоо долоон жингийн хоёрт нь л хоёр тамирчин оруулж болно гэсэн үг.

Мөн “Дэлхийн цом” хэмээх тэмцээнийг хааж, Хотуудын нээлттэй тэмцээн гэж нэрлэх, гэхдээ тивийг нь заавал дурдахаар тогтсон байна. Жишээ нь Италид болох Дэлхийн цом гэж нэрлэхгүй Ромын Европ тивийн нээлттэй тэмцээн (European Open of Roma), Улаанбаатарын Дэлхийн цом гэхгүй Улаанбаатарын Азийн нээлттэй тэмцээн (Asian Open Ulaanbaatar) гэж нэрлэнэ. Тивийн нээлттэй тэмцээнүүдийн алтан медалийг 100, мөнгөн медаль 60, хүрэл медаль 40 оноогоор үнэлэгдэнэ. Харин гранпри тэмцээнд алт 300, мөнгө 180, хүрэл 120 оноо, тивийн аваргын тэмцээний алтан медаль 400, мөнгө 240, хүрэл 160 оноо, Их дуулгын тэмцээнд алт 500, мөнгө 300, хүрэл 200 оноо авна. Тэгвэл “Мастерс” тэмцээний аваргууд 700, аман хүзүүний тамирчин 420, хүрэл медальтан 280 оноо, дэлхийн аваргууд 900, мөнгө 540, хүрэл 360 оноо чансаандаа нэмэх юм. Мэдээж хамгийн их оноотой тэмцээн бол олимп.

Олимпийн аваргууд 1000, мөнгөн медаль 600, гуравдугаар байрны тамирчин 400 оноо авч байхаар боллоо. Мөн ямар ч тэмцээний урьдчилсан жижиг барилдаанд ч ганц ч ялсан байсан оноо авч байхаар зохицуулжээ. Гранпри тэмцээний шагналын сан 100 мянга, Их дуулга 150 мянга, Мастерс 200 мянга, дэлхийн аваргынх 200 мянган ам.долларын шагналын сантай байна. Шинэ улирлаас эхлэн тамирчдын жинг тэмцээний өмнөх өдрийн орой 19.00 цагаас үзэж байхаар тогтлоо. Урьд нь тэмцээний өдөр жин үздэг байлаа. Хэрэв тамирчин жиндээ орж чадахгүй байгаа бол тэмцээний өдөр жинг нь үзэж болно. Барилдааны өмнө тамирчид бие биендээ мэхийн ёслох бөгөөд тэмцээн эхлэхээс өмнө гар барьж болохгүй. Оноо өгөх болон шийтгэх дүрэм ч өөрчлөгдсөн байна.

Жүдогийн дээд оноо болох Иппоныг зөвхөн өрсөлдөгчөө нуруугаар нь шидсэн тохиолдолд өгнө. Өрсөлдөгч нь мост хийсэн ч иппон гэж тооцогдох болно. Шидо торгууль тамирчдын хэн нэгэнд давуу байдал өгөхгүй, самбар дээр зөвх өн техникийн оноо л гарна. Харин оноо тэнцсэн то хиолдолд л шидо цөөтэй тамирчинд ялалт өгөх юм. Барилдааны үеэр гурван шидо өгч болох бөгөөд дөрөв дэх шидогоо авсан тамирчинг хансокэ макэ хэмээн үзэж, өрсөлдөгчид нь ялалт өгнө. Талбай дээр мэх хийсэн бол талбайгаас гарсан хойно ч шүүгч нар зогсоохгүй, үргэлжлүүлэх бол сон. Даралтад 20 секунд дарахад иппон цэ вэр ялалт өгнө. Урьд нь 25 секунд байсан билээ. 10 секунд дарахад юүко, 15 секун дэд вазари үнэлгээ өгнө.

Эцэст нь олон улсын жүдо бөхийн холбооноос тив бүрт шүүгч нарт зориулан семинар хичээл заахаар болжээ.