Чингэлтэй дүүргийн 61 дүгээр сургуулийн хүүхдүүд “Дэлхийн монгол хүн болцгооё” сэдвээр ханын сонины уралдаан зарлаж, өчигдөр шилдгүүдээ тодрууллаа. Тус сургуулийн хүүхдүүд өөрсдийн санаачилгаар хоёр сарын өмнө Кэмбрижийн стандартаар хичээллэж буй хос хэлний “Шинэ эрин” лаборатори дунд сургуульд зочилсон бол, энэ удаа ханын сонин гаргаж, хүсэл мөрөөдлөө илэрхийллээ. 7-11 дүгээр ангийн сурагчдын дунд зарласан энэхүү уралдаанд 20 бүтээл ирснээс С.Даваацэрэн багштай, 9в ангийнхан түрүүлж, иж бүрэн компьютерээр шагнуулсан юм. Дэлхийн бөмбөрцөг дээр номын хуудас дэлгэгдэж буйгаар дүрсэлсэн энэхүү ханын сонины нэг хуудас нь үндэсний онцлогийг харуулсан уйгаржин монгол бичвэртэй, нөгөө нь дэлхийн иргэн болж буй гэсэн агуулгыг илтгэжээ.
Монгол жаал дэлхийд танигдах өдөр ирнэ гэж хүүхдүүд ханын сониныхоо санааг тайлбарласан. 7в, 9б ангийнхны хийсэн ханын сонин тусгай байрын шагнал хүртсэн юм. Ханын сонины уралдааныг дүгнэж, шагнал гардуулахаар очсон БСШУЯ-ны Ерөнхий боловсролын газрын дарга Д.Эрдэнэчимэг “Хүүхдүүд та нар Монгол эх орныхоо маргаашийг илүү хүчирхэг, хөгжил дэвшилтэй, өөрсдийнхөө ирээдүйг өөдрөг гэгээнээр харж төсөөлж байгаа юм байна. Кэмбрижийн стандартыг баримжаалсан шинэчлэл Монголд хөгжил дэвшил авчирна. Олон улсад зөвшөөрөгдсөн Монголын онцлогтой боловсрол мөрөөдөл биш, нэгэнт хэрэгжээд эхэлчихсэн ажил. Mанай улс хоёр жилийн дараа олон улсад зөвшөөрөгдсөн сургалтын хөтөлбөрт шилжинэ. Таван жилийн дараа нэг биш бүх сургуульд энэ бүхэн бодитой ажил хэрэг болно” гэж хэлсэн юм
