Язгуур урлагийн “Хөгсүү” чуулгын төлөөлөл болсон зарим уран бүтээлч дундад Азийн орнуудад аялан тоглолт хийж байна. Чуулгын дарга, соёлын тэргүүний ажилтан Ч.Өнөртүвшин, ардын жүжигчин Р.Самжид, гавьяат жүжигчин Х.Чапаев, соёлын тэргүүний ажилтан Э.Баатаржав нарын бүрэлдэхүүнтэй баг Казах, Киргиз, Узбекистан, Халимаг зэрэг улсад тоглох гэнэ. Сонирхуулахад, дээрх дөрвөн уран бүтээлч ЮНЕСКО-гийн биет бус соёлын өвд Монголоос бүртгүүлсэн язгуур урлагийн долоон төрлөөс гадна ардын урлагийн 15 төрлийн үзүүлбэрийг гаднынханд үзүүлж, эх орноо сурталчлах аж. Ардын язгуур урлагийн 500 гаруй уран бүтээлчийг нэгтгэсэн “Хөгсүү” холбооны “Хөгсүү” чуулга эх орныхоо 21 аймаг, гадаадын 20 гаруй орноор аялан тоглоод байгаа аж.