Эмэгтэй волейболчдын оюутны Азийн аварга шалгаруулах хоёр дахь удаагийн тэмцээн “Буянт-Ухаа” спортын ордонд зургаан өдөр үргэлжилж, өчигдөр өндөрлөлөө. Лигийн аварга “Энагурэ”-гийн тоглогчдоор гол цөмөө бүрдүүлсэн манай волейболчид эхний тоглолтдоо өмнөх тэмцээний аварга Тайландыг 3:2-оор хожсон талаар бид мэдээлсэн. Монголын шигшээ үүнээс хойшхи гурван тоглолтдоо Кыргызстан, Малайз, Хонконгийг тус бүр 3:0-ээр хожиж, аваргын төлөө тоглох эрхээ авсан юм. Бусдыгаа ээлж дараалан хожиж байсан Хонконг манайхны эсрэг овоо өрсөлдөж магадгүй гэж харж байсан ч юм болсонгүй. Тайланд хэдийгээр Монголд хожигдон гараагаа тааруухан эхэлсэн ч удаах учраануудаа буулган авсаар финалд шалгарлаа.

Өчигдөр тэмцээний медалийн төлөөх тоглолтууд болж, шилдгүүдээ шалгаруулав. Эхлээд хүрэл медалийн тоглолт болоход Хонконгийн бүсгүйчүүд Кыргызстаныг 3:0-ээр хожиж, өмнөх тэмцээний дөрөвдүгээр байрын амжилтаа ахиуллаа. Кыргызстаны баг тэдний зэрэглэлд хүрэхэд хол байгаа нь энэ тоглолтоос харагдсан. Ингээд бүгдийн хүсэн хүлээж байсан мөч буюу аваргын төлөөх тоглолт эхлэв. Шигшээ багаа дэмжихээр ирсэн монголчууд ордонг сул суудал үлдээлгүй дүүргэжээ. “Буянт-Ухаа” ордон ашиглалтад орсноос хойш ийм олон үзэгч цугласан тохиолдол цөөн болов уу. Эхний үед манай охид давгүй тоглосон ч эцсийн дүндээ 25:20-оор ялагдав. Харин хоёр дахь парт үзэгчдийн цөсийг хөөргөсөн дөө.

Монголын шигшээ дунд үеэс илүүрхэж, 5-6 онооны давуутай хошуучилж явсан боловч удалгүй бариулж, төгсгөл хэрд 23:23 болон тэнцэх нь тэр. Үүнээс хойш Тайланд тэргүүлж, монголчууд тэнцүүлэх замаар явсаар 30:30 боллоо. Манайхан ганц оноо алдахад л хожигдох эвгүй нөхцлөөс удаа дараа мултарч, үзэгчдээ баярлуулсан. Харин энэ үед хаалтаа амжилттай тавьснаар 31:30 болгон тэргүүлж эхэлсэн. Үүний дараа Тайландын багийн довтолгоог дахин нэг амжилттай хааснаар энэ партад 32:30-аар давамгайлсан юм. Харамсалтай нь манай охид удаах хоёр партад тоглолтоо гаргаж чадахгүй байсаар 14:25, 15:25-аар дийлдэж, эх орондоо аваргалах боломжоо алдлаа. Давуулалтаа алдан, хамгаалалтад сул орон зай үүсгэх зэргээр олон алдаа гаргаж, эхнээсээ оноогоор хоцорсон нь ялагдалд хүрэх шалтгаан болсон юм.

Монголын бүсгүйчүүд 2000 онд нутагтаа болсон Зүүн Азийн АШТ-ий хагас шигшээд Хятадын багт 0:2-оор хожигдож яваад хөгжөөн дэмжигчдийн түрлэг, “Хар сарнай” хамтлагийн цөс хөөргөсөн дууны ачаар гайхалтай эргэн ирэлтийг хийж байсан түүхтэй. Харин энэ удаа тийм ялалт тохиосонгүй ээ. Хэдийгээр өмнөх тэмцээний амжилтаа ахиулж, мөнгөн медаль хүртсэн ч үзэгчид, тоглогчид сэтгэл дундуур үлдсэн биз ээ. Учир нь манайханд Тайландыг хожиж түрүүлэх боломж бүрэн байсан. Гэхдээ чамлахаар чанга атгая. Манайхан ямартай ч том тэмцээнийг өндөр түвшинд зохион байгуулж, тэндээсээ медаль авч чаддаг болсноо харууллаа. Дараа дараагийн тэмцээнд илүү өндөр амжилт гаргах боломж манай охидод байна. Тэмцээний үеэр ажиглагдсан бас нэг зүйл бол Монголын эмэгтэй волейболчид ур чадвар хийгээд нурууны өндрөөр Азийн түвшинд өрсөлдөх хэмжээнд хүрснээ харуулсан. Жаахан тордоод өгвөл оюутны биш, жинхэнэ Азийн аваргаас медаль авах мөч холгүй биз ээ.