Бичлэгийн тоо 3,329
Таван настайгаасаа олонд танигдаж эхэлсэн Майкл Жексон 2009 оны зургаадугаар сарын 25-нд дахин гялалзахгүйгээр үүрд харваж, сая сая фэнүүддээ дурсамж үлдээн буцсан. Хорвоод ховорхон төрдөг авьяастнууд хэдэн мянган жилээр дурсагдаж, тэдний аж амьдрал, амжилт бүтээлээс хойч үе нь суралцан, нэр алдар, уран бүтээл нь мөнхөд амьдарсаар байдаг. Тэдний нэгэн адил попын хаан Майкл Жексоны давтагдашгүй дуу хоолой, онцгой содон бүжгийн хөдөлгөөн, дайчин чанарыг дэлхий даяар дурсан санадаг.
Тэр дундаа хорвоог орхисон өдөр нь олон үйл ажиллагаа зохиож, хаа сайгүй дуу нь эгшиглэдэг. Монголчууд ч энэ өдөр түүнийг санан дурсахаар болжээ. Гэхдээ өвөрмөцөөр. Майкл Жексон гэхээр л рок попоор төсөөлдөг. Тэгвэл энэ удаа түүний 12 дуугаар Улсын филармонийн симфони оркестр бүрэн хэмжээний тоглолт тавихаар бэлтгэл ажилдаа ороод байна. Жил болгон зохион байгуулахаар төлөвлөж буй уг тоглолт их онцлогтой болно гэж Улсын филармонийн хөгжмийн найруулагч, төгөлдөр хуурч Б.Анар хэллээ. Тус тоглолтод гитарчин Д.Өлзий-Орших, хийлч Ч.Дэлгэрцэцэг нар оролцох гэнэ.
