Улаанбаатарыг утаагүй болгох зорилгоор Баянзүрх дүүргийн II хорооны нутаг дэвсгэр “Мамба дацан” хийд, “Бимекс” төв, ЦЕГын 801 дүгээр анги орчмын барилга объектуудыг өчигдөр төвлөрсөн дулаан хангамжид холболоо. Энэхүү ажлыг Засгийн газар, Мянганы сорилтын сан хамтран төлөвлөж, “Цэвэр агаар” сангаас санхүүжүүлэн, нийслэлийн ЗДТГ, “Улаанбаатар дулааны сүлжээ” хувьцаат компани хэрэгжүүлжээ. “Цэвэр агаар” сангаас энэ ажилд 2.5 тэрбум төгрөг зарцуулсан байна.

Нийслэлийн Засаг даргын орлогч Д.Ганболд “Энэ жил Их тойруугийн VI магистраль шугамыг өргөтгөсөн. Үүний дүнд КТМС-ийн хажууд 8.0 Гкал/цийн чадалтай, дулаан хангамжийн шинэ төвийг ийнхүү ашиглалтад оруулж байна. Байгууллага, айл өрхүүдийг төвлөрсөн дулаан хангамжид холбосноор хотын хорт утааг багасган, агаарын бохирдлыг тодорхой хэмжээгээр бууруулах боломжтой боллоо. Энэ хавийн айл өрх, аж ахуйн нэгж байгууллагууд байнгын галлагаагаа зогсоон, хөө тортог, утаа угаараас ангижран, ажиллаж амьдрах нөхцөл эрс сайжирна.

Мөн хотын ерөнхий төлөвлөлтийн дагуу барих сургууль, цэцэрлэг, усан спортын ордон, орон сууцны хорооллуудыг төвлөрсөн дулаан хангамжид холбох нөхцөл бүрдэж байгаа” гэсэн юм. Дотоод хэргийн их сургууль, УС-15 орчим, Дэнжийн мянгын Цагаан байр орчимд цаашид мөн ийм төв барина. Ингэснээр ханан пийшинтэй 1000 гаруй айл өрх болон 300 гаруй аж ахуйн нэгжийн түүхий нүүрсний хэрэглээ 10 хувиар буурах юм байна.

О.Намчин