Цэрэг
халагдаж байгаатай холбогдуулан нийслэлийн дүүргийн цэргийн штабууд
ажлын байрны өдөрлөг зохион байгуулж буй аж. Өнгөрсөн оноос цэргээс
халагдсан залуусыг ажлын байранд зуучлах арга хэмжээ зохиодог болсон юм.
Сүхбаатар дүүргийн ЗДТГ-ын Цэргийн штабын дарга, хурандаа Б.Готовдорж “
Дүүргийн Хөдөлмөр, халамж үйлчилгээний хэлтэс, ажил олгогч байгууллага,
албан бус сургалтын төвүүд хамтран өнгөрөгч бямба гаригаас эхлэн энэ
арга хэмжээг зохион байгууллаа. Бидний зорилго бол цэргийн албан
хаагчдаа хүлээж авахдаа мэргэжилгүйг нь төрөл бүрийн богино хэмжээний
сургалтад хамруулах, мэргэжилтэйг нь ажлын байранд зуулчлах явдал.
Өнгөрсөн онд халагдсан цэргүүдийн 50 гаруй хувь нь энэ өдөрлөгөөр
дамжуулан ажлын байртай болсон” гэв.
Ажил
олгогч төрийн болон хувийн хэвшлийн байгууллагууд цэргийн алба хаагаад
ирсэн залуусыг ажлын бүтээмж сайтай, хүнээс үг сонсохдоо хүлээцтэй
ханддаг, зан ааш нь төлөвшсөн гээд ажилд авахдаа дуртай байдаг гэнэ.
Түүнчлэн залуус цэргийн алба хаах хугацаандаа жолооч, барилгачин, замын
инженер зэрэг төрөл бүрийн мэргэжлийн анхан шатны мэдлэг эзэмшдэг байна.
Б.ДЭЛГЭРХИШИГ
