Японы
“Олон улсын байгаль орчныг хамгаалах” төрийн бус байгууллага манай
улсад эмнэлгийн зүү, тариур устгах зориулалттай 20 шинэ аппарат
хандивлаж буйгаа өчигдөр Эрүүл мэндийн сайдад гардууллаа. Уг арга
хэмжээнд Япон улсын ЭСЯ, ЖАЙКА-гийн Монгол дахь төлөөлөгчийн газар,
Монголын элэгний эмгэг судлалын холбооныхон оролцов. Халдварт өвчний
тархалтыг зогсоох ажилд дэмжлэг үзүүлэх зорилгоор тус бүр нь 1800-2500
долларын үнэ бүхий дээрх аппаратуудыг манайд бэлэглэсэнд талархаж буйгаа
сайд С.Ламбаа энэ үеэр илэрхийлсэн. Тэрбээр “Манай улсад ийм төхөөрөмж хуруу дарам цөөн болохоор хэрэглэсэн зүү, тариураа устгахад хүндрэлтэй байдаг. Зүү, тариураас үүдэлтэй шар өвчин манай хүн амын дунд түгээмэл гардаг учраас 3000 орчим тариурын тасгаа бүгдийг нь ийм аппаратаар хангах боломжийг судалъя. Хамтарч ажиллаж болно биз дээ” гэлээ. Харин Японы талаас “Та нар эхлээд эдгээр багажийг хэрэглээд үз.
Сэтгэлд
тань нийцэх юм бол нэмж нийлүүлэх боломжтой” гэж хэлэв. Цахилгаанаар
шууд, бас цэнэглээд ажиллуулж болдог энэ аппаратыг Япон, АНУ-ын Эрүүл
мэндийн яам хүлээн зөвшөөрсөн, эдэлгээ урт учраас бизнест л ганц “сул
талтай” хэмээн тус байгууллагынхан хошигнолоо. Энэ үеэр “Олон улсын
байгаль орчныг хамгаалах” төрийн бус байгууллагын тэргүүн Сүзүки Хажимэг
Эрүүл мэндийн яамны “Хүндэт тэмдэг”-ээр шагнасан.
Л.ГАНЧИМЭГ
