Японы мэргэжлийн сүмо бөхийн аки башёгийн 11 дэх өдрийн барилдаан тун сонирхолтой болж өнгөрлөө. Тамаваши Мөнх-Оргилын хувьд өчигдөр унаа авсан. Ингэснээр манай бөх дахин унах эрхгүй бөгөөд хэрвээ унавал жюүрюүд буурах нь тодорхой болно. Тэгвэл зургаан даваатай байсан Какирюү өчигдөр мөн л уналаа. Ингэснээр тэрбээр үлдэж байгаа өдрөөс хоёр даваа авах нь хэвээр үлдэв. Харин долоон унаатай байсан манай бөхчүүд хоорондоо таарч барилдан Кёкүтэнхо давсан байна. Түүнтэй барилдсан Токитэнкү унаснаар качигоши хийх боломжгүй болсон юм. Тэрбээр ирэх башёд чансаа буурч барилдана. Тэгвэл комүсүби Асасэкирюү өчигдөр өрсөлдөгчөө баралгүй өвдөг шороодсон. Тэмцээнийг тэргүүлэгчдийн хоёрдугаар эгнээнд бичигдэж байсан Ама урамтай сайхан барилдаж даваа авснаар байраа хадгалж үлдлээ. Мөн Хакүхо хамт тэргүүлж явсан Гоэйдотой таарч зайлах мэхээр давж аки башёг ганцаараа тэргүүлж эхэлсэн.
Энэ өдөр Фүтэно качигоши хийж ирэх башёд чансаа ахих нь тодорхой болов. Макүүчи зиндаанд хамгийн олон удаа таарч барилдаж байгаа озэки Кайо, Чиётайкай нар өчигдөр хоорондын 46 дахь барилдаанаа хийж Чиётай-кайн ялалтаар өндөрлөв. Тэд арван жилийн өмнөх аки башёд анх таарч байсан ажээ. Одоогийн байдлаар Хакүхогийн араас Ама, Котомицүки, Гоэйдо нар нэхэж байна. Тэгвэл жюүрюүд барилдаж байгаа манай бөхчүүд сүүлийн өдрүүдэд маш сайн барилдаж качигоши хийж чансаа ахих магадлал өндөр байна. Коорюү өчигдөр Арантай барилдаж барьцтай түлхэж гаргах мэхээр даваа авч качигоши хийсэн байна. Одоо тэрбээр Аран, Ямамотояма, Тосаютака, Кайхо нарын дөрвөн бөхийн хамтаар жюүрюүг тэргүүлэн барилдаж байгаа бөгөөд сүүлийн өдөр түрүү бөх тодорч магадгүй.