Германы Дрезден хотод болсон Дэлхийн шатрын XXXVIII олимпиадад манай эмэгтэй баг тамирчид амжилттай оролцсон талаар бид мэдээлж байсан. Эмэгтэйчүүдийн багийг их мастер В.Мөнгөнтуул, олон улсын мастер Д.Янжиндулам, спортын мастер А.Энхтуул, Ө.Нямтуяа, Ц.Мөнхчулуун нарын шилдгүүд бүрдүүлж оюунаа сорин өрсөлдсөн юм.

Мөн спортын гавьяат дасгалжуулагч П.Жигжидсүрэн багш шатарчдаа дасгалжуулан тэмцээнд оролцуулсан байна. Дэлхийн 114 орноос 17 дугаар байрт шалгарсан бүсгүйчүүдийг өчигдөр Биеийн тамир спортын улсын хорооны дарга Ч.Наранбаатар хүлээн авч уулзан баяр хүргэлээ. Манай бүсгүйчүүд уг тэмцээнд “С” хэсгээ тэргүүлэн алтан медалиар энгэрээ мялаасан нь яах аргагүй том амжилт. Амжилт гаргасан тамирчдыг өчигдөр монголын үндэсний олимпийн хорооны ерөнхийлөгч Д.Загдсүрэн хүлээн авч амжилтаар нь бахархжээ. Эмэгтэй тамирчид 11 тоглолт хийснээс зургаан хожил, хоёр тэнцээ, гурван хожигдол хүлээсэн амжилтаар шилдгүүдийг сандаргасан гэнэ. Латви, Болгар зэрэг шатрын орнуудын шатарчдыг буулгаж, тэнцсэн нь дэлхийн анхаарлын төвд байсан гэхэд болно. Үүгээр ч зогсохгүй хоёр тамирчин нь шууд олон улсын мастерын болзол хангасан баярт мэдээг монголчууддаа давхар дуулгаж байна. Энэ бүхнээс үзвэл 2008 он спортынхны хувьд медалийн хур буулгасан амжилтын жил байсан гэдэг нь тодорхой. Ингээд уг тэмцээнд оролцож олон улсын мастерын болзол хангасан А.Энхтуултай уулзаж сэтгэгдлийг нь сонссон юм.

-Олон Улсын мастерын болзол хангасанд баяр хүргэе. Сэтгэгдлээ хуваалцахгүй юу?
-Баярлалаа, сэтгэгдэл маш өндөр байна. Гурван хэсэгт хуваагдаж тоглон 116 оноо авч 17 дугаар байрт орлоо. Ингэснээр олон улсын мастерын болзлыг шууд хангасан. Бас гуравдугаар зэрэглэлдээ би алтан медаль хүртсэн.
-Тэмцээнд оролцоход хамгийн чухал зүйл нь санхүүгийн асуудал. Үүнийг хэрхэн зохицуулсан бэ?
-Мэдээж, тэгэлгүй яахав. Намайг болон бусад тамирчдыг уг тэмцээнд оролцоход гүн туслалцаа үзүүлсэн “Бороо Гоулд”, “Монгол-Чех метал” компаниудын хамт олонд баярласнаа илэрхийлье. Бас миний энэ амжилтад хамгийн их нөлөөлсөн Монгол Улсын гавьяат дасгалжуулагч, олон улсын мастер П.Жигжидсүрэн багшдаа маш их баярлалаа гэж хэлмээр байна.
-Шавь орж, удирдлаган дор нь шатрын спортоор хичээллэх болов?
-Би есөн наснаасаа эхлэн шатар тоглосон. Хоёр жилийн өмнөөс П.Жигжидсүрэн багшийн удирдлаган дор хичээллэж байна.
-Хамгийн хүнд хэцүү тоглолт?
-Тоглолт бүхэн маань л хэцүү байсан. Ихэнх нь надаас дээгүүр цолтой шилдэг тамирчид байсан.
-Тэгвэл тэмцээнд оролцож байхад хамгийн сайхан зүйл нь юу байв?
-Болгарын их мастер Маргарита Воиситай тэнцэж, Израйлийн их мастер, Литвагийн фиде мастеруудыг хожсон явдал байсан юм болов уу. Би нэг ч өнжилгүй 11 өрөг тоглолт хийсэн.
-Дэлхийн шатрын олимпиадад өмнө нь оролцож байсан уу?
-Үгүй. Анх удаагаа энэ олимпиадад оролцоод ийм амжилт үзүүллээ.
-Тэгвэл олон улсын тэмцээнд оролцож байсан биз дээ. Гаргаж байсан амжилтаасаа дурьдахгүй юу?
-Олон тэмцээнд оролцсон. Хэрэндээ гайгүй амжилтууд гаргаж байгаа. Би их мастер Б.Мөнгөнтуул эгчийн амжилтыг хоёр ч удаа давтаад байгаа шүү дээ.

Б.Зулаа