Монгол Улсын Ерөнхийлөгч Н.Энхбаяр зарлиг гаргаж зарим хүмүүсийг төрийн дээд, одон медалиар шагналаа. Ерөнхийлөгчийн зарлигаар “Их шавь”-ийн дээд сургуулийн зөвлөх дасгалжуулагч , Ч.Дамдиншаравт Монгол Улсын ардын багш, төр, нийгмийн ахмад зүтгэлтэн Ц.Балхаажавт Монгол Улсын шинжлэх ухааны гавьяат зүтгэлтэн Монголын цанын холбооны ерөнхий нарийн бичгийн дарга, олон улсын хэмжээний мастер Л.Доржид Монгол Улсын гавьяат тамирчин, Электрон техник, машин судлалын нэгдлийн эрдэмтэн нарийн бичгийн дарга, доктор, профессор Д.Ёндонсүрэнд Монгол Улсын гавьяат тээвэрчин, МУИС-ийн Гадаад хэл, соёлын сургуулийн багш, доктор, профессор Э.Равданд Монгол Улсын гавьяат багш, “Айвенхоу майнз Монголия Инк” ХХК-ийн зөвлөх геологич Д.Гарамжавт Монгол Улсын аж үйлдвэрийн гавьяат ажилтан, “Хаан чацаргана” ХХК-ийн захирал Б.Балганд Монгол Улсын ХААН гавьяат механикжуулагч, Усны үндэсний хөтөлбөрийг дэмжих төвийн захирал З.Жанжаадоржид Монгол Улсын байгаль орчны гавьяат ажилтан, “Капитал” банкны зөвлөх Н.Мишигдоржид Монгол Улсын гавьяат эдийн засагч, “Майн Инфо” ХХК-ийн зөвлөх инженер, хошууч генерал Ю.Жаргалд Монгол Улсын гавьяат барилгачин, Монголын татвар төлөгчдийн холбооны гүйцэтгэх захирал Ж.Халзанбандид Монгол Улсын гавьяат эдийн засагч, Усны институтийн зөвлөх Ц.Балдандоржид Монгол Улсын байгаль орчны гавьяат ажилтан, Боксын үндэсний шигшээ багийн тамирчин У.Мөнх-Эрдэнэд Монгол Улсын гавьяат тамирчин, Монголын үндэсний бөхийн холбооны дэд тэргүүн Д.Данзан, Монголын Энхтайван, найрамдлын холбооны ерөнхийлөгч, доктор Д.Цахилгаан нарт Монгол Улсын соёлын гавьяат зүтгэлтэн цол тус тус олголоо.
Мөн Сүхбаатарын одонгоор Монгол Улсын Засгийн газрын хэрэгжүүлэгч “МонЦаМэ” агентлагийн Ахмадын хорооны дарга Г.Балдандорж, Хөдөлмөрийн гавьяаны улаан тугийн одонгоор Ж.Ломбо, Стратегийн судалгааны хүрээлэнгийн захирал Д.Мягмар, Дархан-Уул аймгийн “Дархан Өлзий” авто сургуулийн захирал Л.Өлзийсүрэн, Нүүдлийн соёл иргэншлийг судлах олон улсын нийгэмлэгийн ерөнхийлөгч Дарь.Сүхбаатарыг, Алтангадас одонгоор Нийслэлийн Татварын газрын татварын улсын байцаагч Д.Алтанцэцэг, Боловсрол, соёл, шинжлэх ухааны дэд сайд Ч.Куланда, Сангийн яамны Төсвийн бодлого зохицуулалтын газрын ахлах мэргэжилтэн Х.Оюундэлгэр, Улсын Их Хурлын Тамгын газрын ахлах зөвлөх Н.Цогтсайхан, Цэргийн гавьяаны одонгоор Нийслэлийн Сүхбаатар дүүргийн онцгой байдлын хэлтсийн дарга, дээд ахмад Ё.Амарбаясгалан, Хөдөлмөрийн хүндэт медалиар Нийслэлийн Чингэлтэй дүүргийн 11 жилийн 5 дугаар сургуулийн бага ангийн багш Д.Энхжаргал, Нийслэл дэх хувийн хэвшлийн “Таны төлөө бид” эмнэлгийн мэс заслын сувилагч Н.Зандраасүрэн, Цэргийн хүндэт медалиар Зэвсэгт хүчний 189 дүгээр ангийн холбооны жижүүр, хошууч Б.Чинзориг, Зэвсэгт хүчний Барилгын цэргийн 017 дугаар ангийн барилгачин Д.Энхболд нарыг тус тус шагнасан юм.
Монгол Улсын Ерөнхийлөгчөөс төрийн өндөр дээд одон медаль хүртсэн зарим хүмүүсийн сэтгэгдлийг сонсов
Монгол Улсын гавьяат тамирчин У.Мөнх-Эрдэнэ:
Монголын боксын холбооны удирдлага, тамирчид, Биеийн тамир спортын хороо, “Эрдэнэт” үйлдвэр, багш нар, гэр бүлийнхэндээ баярлаж явдгаа хэлье. Энэ онд хамгийн сүүлд Дэлхийн цомоос мөнгөн медаль хүртсэндээ баяртай байгаа. Монгол эх орон маань үүрд мандан бадрах болтугай.
Монгол Улсын соёлын гавьяат зүтгэлтэн Д.Цахилгаан:
Оны отгон гавьяатуудын нэг болсондоо баяртай байна. Өнөөдөр билэгт сайн өдөр юм. Өнөөдөр дипломатуудын хувьд их том баярын өдөр. Би энэ өдөр Төрийн дээд шагнал авч байгаадаа бэлгэшээж байна. Манай дорнын шашин судлалд амирлуулах, дэлгэрүүлэх, бүтээхийн гурван үйлийг хичээвэл хүн хүн шиг явдаг юм гэж заасан байдаг. Миний насаараа зүтгэсэн Энхтайван найрамдлын төлөөх ажил бол яг л энэ амирлуулах, дэлгэрүүлэх, бүтээх үйлсэд хамаарна. Олон жил буянтай үйлс хийхээр буян нь ирдэг юм байна. Өнгөрсөн жилүүдэд Энх тайвны их наадам, Дэлхийн Монголчуудын чуулга уулзалт хийлээ.
Хөдөлмөрийн гавьяаны улаан тугийн одонт Дарь.Сүхбаатар:
Монголчууд бэлгэ дэмбэрэл боддог ард түмэн. Би өөрөө их бэлгэ дэмбэрэл бодож явдаг. 1911 оны яг энэ өдөр Монгол Улс манжийн дарангуйллаас чөлөөлөгдөж, тусгаар тогтнолоо өөрсдөө байлдаж олж авсан. Тусгаар тогтнолын өдөр нь өнөөдөр юм. Энэ өдөр Монголын ардчилсан төр миний нөхдийн хамтарч бий болгосон ардчилсан төр маань төрийн одонгоор шагнаж байгааг би бэлгэшээн хүлээн авч байна. Хамгийн гол нь 1988 оноос хойш өнөөдрийн хүртэл Монголын ардчиллын төлөө шударга, цуцалтгүй явсан үйл хэргийг үнэлж байгаа байх гэж бодож байна.
Алтан гадаст одонт Ч.Куланда:
20-иод жилийн өмнөөс Монголын хэвлэл мэдээлэл, ардчилал хүний эрхийн төлөө зүтгэсний минь үнэлгээ байх гэж бодож байна. Энэ үйлст ганцхан би биш ардчиллын төлөө явсан нөхдүүд, үүний төлөө зүтгэж явсан монголчуудын хөдөлмөрийн үнэлгээ гэж бодож байна.
Н.Энх