Нэгэн хэмээр тогших мэт тог тог хийх чимээ гарч хүмүүс уухайлах дуу ширээний теннисний "Оч" клубт дөхөх тусам улам тод сонсогдож байлаа. Монголын ширээний теннисний холбооноос хоёр дахь удаа зохион байгуулж байгаа "Оюутны их наадам" өчигдөр тус клуб дээр эхэлсэн нь энэ.
Анхдугаар тэмцээч нь 2005 онд зохион байгуулагдаж цөөн тооны иx дээд сургуулийн баг оролцож байсан бол энэ удаа хүрээгээ тэлж их, дээд найман сургуулийн , эрэгтэй найм, эмэгтэй долоон баг оролцож байгаа аж. Эрэгтэй, эмэгтэй багууд "A", "В", "С", "D" гэсэн дөрвөн хэсэгт хуваагдаж тоглосон юм.
Энэ тэмцээнийг улсын аварга Л.Алтантулга, н.Батхишиг, Б.Эрдэнэсувд, залуу тамирчин Ч.Номин-Эрдэнэ нар чимж үнэхээр шилдэг тамирчид гэдгээ харуулж байлаа. Тэдний бие халаалт хийх нь хүртэл бусдаас арай л өөр, харилцаж буй бөмбөгийг нь олж харахад хэцүү байсан юм.
Багуудын хэсгийн тоглолтын явцад "оюутны наадам гэсэн хэрнээ Ерөнхий боловсролын сургуулийн сурагч тоглууллаа" хэмээн өөр хоорондоо маргаж байгаа нь ажиглагдсан. Хэсгийн тоглолтоор 10.00 цагт эхэлсэн тэмцээн 14.30 цагт завсарлаж тэмцээний нээлтийн ажиллагаа боллоо. Тэмцээнийг Монголын ширээний теннисний холбооны нарийн бичгийн дарга Ч.Амарсанаа, шүүгч, "Оч" клубын дасгалжуулагч н.Галбаатар, ШУТИС-ийн дасгалжуулагч багш Н.Дорж нар нээж тамирчдаас шударга өрсөлдөж амжилт гаргахыг хүслээ. Төрийн дуулал эгшиглэж тамирчид төрийн далбаа байрлуулсан зүг харж дуулахад хүүхдээ дагуулан тэмцээн сонирхож буй ээжүүд суудлаасаа босохгүй байсан нь дэндүү муухай харагдаж дээд давхарт нь байх үзэгчид ундааны сав шидэж байгаа харагдав. Нээлтийн ажиллагааны дараа хэсгийн тоглолт үргэлжилсэн юм. Дугаар шилжих мөчид эмэгтэйчүүдийн "А" хэсгээс МУИС-ийн баг гурав, "Аварга" дээд сургуулийн баг хоёр, "В" хэсгээс ШУТИС-ийн баг гурав, "Отгонтэнгэр" дээд сургуулийн баг хоёр, "С" хэсгээс БХИС гурав, Төмөр замын дээд сургууль хоёр хожилтойгоор тус тус шалгараад байв.
Харин эрэгтэйчүүдийн "А" хэсгээс "Отгонтэнгэр", "В" хэсгээс ТЗДС, "Орхон", "С" хэсгээс МУИС, "D" хэсгээс ШУТИС-иуд тус тус хоёр хожилтойгоор хэсэг тус бүртээ тэргүүлээд байлаа.
Оюутны их наадмын тэмцээний ерөнхий шүүгч н.Галбаатарын зөвлөснөөр тэмцээний нарийн бичгээр ажиллаж байгаа ахмад тамирчин Б.Мөнхнямтай цөөн хором ярилцсан юм.
-Энэ тэмцээний онцлогийн талаар ярихгүй юу?
-18-26 насны оюутан залуусын дунд явагддаг. Дөрвөн жилд нэг удаа болдог наадам. Энэ удаагийн тэмцээнд найман дээд сургуулийн 40 гаруй тамирчид оролцож байна.
-Тэмцээн ямар ямар төрлөөр явагдаж хэдэн өдөр үргэлжлэх вэ?
-Тэмцээн баг, ганцаарчилсан, холимог хос гэсэн гурван төрлөөр явагдаж гурван өдөр үргэлжилнэ.
-Оюутны наадам гэхээр аймаг хотуудад явагдах уу?
-Энэ бол Улаанбаатар хотын оюутнуудын наадам. Хөдөөгүүр зүүн, баруун, төвийн гэж бүсчилж явагдана. Энэ тэмцээнээс шалгарсан тамирчид улсын шигшээ тэмцээнд оролцоно.
-Шигшээ тэмцээн хэдийд болох вэ?
-Ирэх сарын 4-8-ны хооронд Улаанбаатар хотод болно.
-Насанд хүрэгчдийн улсын аваргын тэмцээнтэй цаг хугацааны хувьд ойрхон болох нь уу?
-Насан хүрэгчдийн улсын аваргын тэмцээн дөрөвдүгээр сарын 9-12-нд болно.
-Та энэ спортоор хичнээн жил хичээллэсэн бэ?
-34 жил хичээллэсэн, спортын мастер цолтой.
-Олон жил энэ спортоор хичээллэсэн хүний хувьд сайн тоглож байгаа шинэ залуу тамирчид байна уу, ажиглав уу?
-Хэдийгээр оюутны аварга ч гэлээ насны хязгаартай. Шинэ залуу тамирчид гэж ярьж болохгүй байх. Оюутны ангилалд 18-26 насныхан хамрагдаж байгаа. Өнөөдрийн байдлаар тэр тийм ийм гэж хэлэх боломж алга.
-Та 34 жил энэ спортоор хичээллэсэн гэсэн. Таны хичээллэж эхэлж байсан үе өнөө үе хоёр ямар ялгаатай байна вэ?
-Өөр байлгүй яахав. Энэ спорт одоо хүүхэд багачуудын дунд их өргөжсөн. Нэг их зай талбай шаардаад байдаггүй шүү дээ. Саяхан болж өнгөрсөн өсвөрийн улсын аваргад гэхэд 200-гаад тамирчид оролцлоо. Манай тамирчдад ч өсөх бололцоо бий.
-Монголын тамирчид дэлхийн хэмжээнд ямар хаахан нь явж байгаа бол?
-Бид одоогоор "С" хэсэгт явж байна. Бидний зорилго бол "В" хэсэгт орох. Тавдугаар сард бид Японы Ёхома хотод дэлхийн аваргын нэг бүрчилсэн тэмцээнд оролцоно. Энэ тэмцээнд манай улсын аварга, лигийн тэмцээнээс шалгарсан тамирчид оролцоно. Бид ритингийг нь гаргасан байгаа.
-Аливаа тэмцээний нэг гол зүйл нь шагналын сан байдаг шүү дээ?
-Шагналыг Улаанбаатар хотын биеийн тамирын газраас гаргаж байгаа болохоор тодорхой хэлж мэдэхгүй байна.
С.Туул