БНХАУ-ын “Саньлу” хүүхдийн сүү, сүүн бүтээгдэхүүн үйлдвэрлэгч компанийн бүтээгдэхүүнээс 400 гаруй нялх хүүхэд бөөрний чулуутай болсон байж болзошгүй талаар манай сонин өмнөх дугаартаа мэдээлсэн билээ. Хятадын барааны чанарын хяналт шалгалт, хорио цээрийн үндэсний Ерөнхий Газрын дарга Ли Чанжян энэ сарын 14-ний өдөр хэвлэлийнхэнд мэдэгдэхдээ, “Барааны чанарын хяналт шалгалтыг 150 гаруй төвийнхөн бүх Хятадын хүүхдийн хэрэглээний хуурай сүүнд шинжилгээ хийж байна. Үүний дүн нэг хоёр хоногийн дотор гарна. Энэ дүнг нийтэд мэдээлэх болно” гэжээ. Хятадын барааны чанарын хяналт шалгалт, хорио цээрийн үндэсний ерөнхий газраас мөн өдөр ажлын хэсгээ Хэбэй, Гуандүн, Хэй Лүнжян, Өвөр Монгол зэрэг Хятадын сүүн бүтээгдэхүүний үйлдвэр нэлээд төвлөрсөн дөрвөн муж районд илгээж, хүүхдийн хэрэглээний “Саньлу” маркийн хуурай сүүнд хяналт тавиулсан байна. Зах зээлд борлуулж байгаа хуурай сүүнд ч холбогдох салбарынхантай хамтран бүх талын шалгалт хийж байгаа аж. Уг компанийн сүү зах зээлд 700 мянган тонн гарсан байгаа гэсэн. Хэрэв худалдаанд байгаа бол манай улсад орж ирж худалдагдаж байж болзошгүй юм. Энэ талаар манай сурвалжлах хэсэг албаны хүмүүсээс өчигдөр тодруулсан юм. “Саньлу” компанийн хүүхдийн сүүг манай улсад оруулж ирэх санал тавьж өмнө нь хоёр бүтээгдэхүүнийхээ дээжийг шинжилгээнд хамруулж байжээ. Харин УМХГ-аас импортоор оруулж ирэх зөвшөөрлийг нь олгоогүй буцааж байсан аж. Хэрэв импортоор орж ирэх зөвшөөрөлтэй байсан бол манай улсад хаагуур худалдаанд байгааг нь тогтоох боломжтой юм байна. Харин мэргэжлийнхэн энэ сүүг манай худалдаанд байхгүй гэх албан ёсны мэдээллийг өгч чадахгүй гэсэн. Учир нь ганзагаар энэ мэт сүү орж ирээд хаа нэгтээ худалдаалагдаж байхыг үгүйсгэхгүй гэж байлаа. Энэ талаар УМХГ анхааралдаа авч хяналт тавихаа мэдэгдсэн юм.

Ж.Хүслэн