Японы тал 1932 оноос эхлэн тагнуул туршуулын шинжтэй үйл ажиллагаа явуулж байснаа 1936 оноос Япон, Манжийн цэрэг Монголын хилийн Улаан бургас, Булан дэрс, Адаг дулаан зэргийн чиглэлээр хил зөрчин өдөөн хатгаж байлаа. Иймд 1937 оны хавраас ЗХУ 1936 оны ЗХУ-БНМАУ-ын "Харилцан Туслалцах Хэлэлцээр"ийн дагуу цэргийн хүчээ Монголын хилээр оруулав.

Цагийн байдалд дүн шинжилгээ хийсний үндсэн дээр И.В.Сталин Киевийн Цэргийн Тойргийн командлагчийн албан тушаал эрхэлж байсан Георгий Жуковыг Монгол дахь 57-р корпусыг удирдуулахаар томилжээ. Армид жагсаалын цэргээс маршал болтлоо алба хаасан тэрээр зан чанарын хувьд төрөлхийн яхир хатуу, хянуур, үнэг мэт зальтай, мэргэжлийн ур чадвар, нэр хүндийн хувьд Зөвлөлтийн армийн дээд тушаалын офицерууд, Сталины хүртэл атаархлыг төрүүлсэн нэгэн байсан бөгөөд хожим А.Хитлерийг дарсан жанжин гэсэн эрхэм алдрыг хүртсэн ажээ. Ирсэн даруйдаа ажилдаа шуурхайлан орж 57-р корпусыг Монголын Ардын Армийн анги нэгтгэлүүдтэй нэгтгэн армийн 1-р бүлгийг эмхлэн байгуулж, Зөвлөлт-Монголын цэргийн нэгдсэн удирдлагыг бий болгов. 1939 оны 5 сарын 11-нд Япон болон Өвөрмонгол, Манж-гогийн нэгдсэн 10,000 орчим цэрэг, нисэх онгоц, танкаар дэмжүүлсэн хүчээр Монголын 22-р морьт хороог Халх голын зүүн эргээс буюу Мана уул орчмоос шахаж баруун эрэг хүртэлх газрыг эзэлжээ. Үүний хариуд Монгол, ЗХУ-ын цэрэг сөрөг давшилт хийн 5 сарын 29-нд хил хүртэл түржээ.

Дараагийн тулалдаанд 2 тал эрчимтэй бэлдэж эхэллээ. Ингээд 7 сарын 11-нд Баянцагаан орчим дахь тулалдаанд Япончууд 38 000 цэрэг, танк, хуягт техник, нисэх хүчний ихээхэн хүчээр довтолсон боловч дахин цохигдож ухрав.

Гурав дахь тулалдаанд Японы тал Баянцагаанд цохигдсоны тооцоог хийх зорилгоор цохилт өгөх, Баянтүмэн (одоогийн Дорнод аймгийн төв Чойбалсан хот), улмаар Улаанбаатарын чиглэлд ерөнхий давшилт хийх шаталсан төлөвлөгөөний дагуу ар талаасаа явган цэргийн 2 хороо, хуурай замын 1 бригад , бусад анги нэгтгэлүүд, Өвөр-Монгол, Манжийн армийн хэд хэдэн хороогоор амьд хүч, Нисэх онгоц, их буу (далайн эргийн хамгаалалтын), хуягт техникийн тоог нэмэгдүүлж хүчээ сэлбэв. Монгол, ЗХУ-ын тал ч үүний хариуд буудлагын 2 дивиз, танкын 2 бригад, агаарын десантын бригад, их бууны хороог ЗХУ-аас татжээ. Ингэснээр Японыхоос 1.5 дахин их цэрэг, 1.7 дахин их пулемет, 2 дахин их их буу, 4 дахин олон танк, 1.6 дахин их онгоц хуралдуулав. Эдгээрийн үр дүнд 8 сарын 20-нд Зөвлөлтийн арми гэнэдүүлэн өрсөж 70 км өргөн фронтоор давшилт хийж япончуудыг хэсэг хэсгээр нь бүсэлж 7 хоногийн дотор бүрмөсөн бут цохижээ.