Ёнпонду арал уруу буудсан хойд солонгосын цэргүүдийн ярилцлага

Хойд Солонгосын төв телевизээр нэвтрүүлсэн Ким Чон Ир-ийг Батлан хамгаалах Зөвлөлийн Дээд Штабын даргаар томилогдсоны 19 жилийн ойд зориулсан нэвтэрүүлэгт өнгөрсөн сарын 23-нд Ёнпонду арлыг буудахад оролцсон цэргийн албан хаагчид санал сэтгэгдлээ илэрхийлжээ.

   Ким Мүн Чол түрүүч тухайн үеийн нөхцөл байдлын талаар:

   -Манай харъяа тэнгисийн бүсэд дайсны Их бууны сум тусан дэлбэрч  байгааг хараад бидний нүднээс хилэнгийн дөл бадарч байсан бөгөөд гал нээх тушаал ирмэгц өс хорсолдоо автан дайсны зүг аянга цахилгаан  мэт галан мөндөрийг хайр найргүй илгээсэн юм... гэж ярьсан байна.

Офицер Ким Кён Сү “Тэгэхэд бид эхэлж өдөөн хатгасан дайсныг бүгдийг галд автуулж үнсэн товрог болгох зорилготой галан аянга буулгасан бөгөөд “Цохих л юм бол цохино” хэмээн манай талын мэдэгдэл  хоосон яриа биш болохыг дайсанд харуулсан юм. Дайсны өдөөн хатгалганд цочирдсон байдалтай байсан манай цэргүүд “Нөхөр Дээд Штабын дарга Ким Чон Ирийн төлөө амиа золиослон тулалдъя, дайсанд өршөөл энэрэлгүй үхэл илгээе хэмээн хашгирцгаасан.” хэмээн нэмж хэлжээ.

Пак Тэй Гүн хэмээх офицер “Хэрвээ дайснууд манай нутагт дайны гал асаах л юм бол төсөөлөхөд ч бэрх хатуу ширүүн цохилтыг түшиц баазуудад нь өгч үнсэн товрог болгох болно. Дайснууд манай их бууны ам үргэлж нээлттэй байгаа гэдгийг санаж явах хэрэгтэй” гэж анхааруулсан байна.

Өнгөрсөн сарын 20-нд Ёнпонду арлын орчим Өмнөдийнхний явуулсан тэнгисийн буудлагын сургуулилалтын үеэр Хойд Солонгосын их сургуулиудад "Өмнөд Чусоны тал Пён Ян хотыг бөмбөгдөнө гэнэ” гэсэн цуурхал тарсан гэж Америкийн “Чөлөөт Ази” радио станцаас мэдэгдсэн байна.

   Уг мэдээнд “ Ким Ир Соны нэрэмжит Улсын их сургуулийн Улс төр эдийн Засагийн анги, Хувьсгалт түүхийн ангийн элит айлын хүүхдүүд уг өдөр хичээлдээ ирээгүйгээс ирц 30 хувьтай байсан” гэж нэгэн оюутны ярьсныг иш татжээ.

Мөн сүүлийн үед “Их сургуулиудаар Хойд солонгосын цэргийн албан хаагчдаас Ёнпонду арлын буудалцааны үеэр 2 офицерийг оролцуулаад 7хүн алагдаж, 4 хүн шархдсан гэсэн цуурхал тараад байгаа гэж Хойд Солонгосын нэгэн их сургуулийн багш ярьсан гэнэ.

Эх сурвалж : Хангүг илбус сонин(한국일보 )

Орчуулсан :   Нэнү