Өмнөговь аймгийн Ханхонгор суманд өнгөрөгч бямба гаригт газар дахин 4.6 магнитудын хүчтэй хөдөлсөн байна. Сумын төвөөс зүүн хойш 20 км зайд болсон энэхүү газар хөдлөлт нутгийн иргэдэд тод мэдрэгджээ. Өнгөрсөн наймдугаар сарын 27-нд тэнд газар долоон баллын хүчтэй хөдөлсөн билээ. Үүнээс хойш 60 гаруй удаа чичирхийлэл мэдрэгдээд байгаа аж. Ханхонгор сум аймгийнхаа төвөөс 60 гаруй км зайд оршдог. Газар хөдлөлтийн улмаас зарим орон сууц, цэцэрлэг болоод Онцгой байдлын хэлтсийн байрны хананд ан цав үүссэн гэж удирдлагууд нь хэлэв.

Тухайн үед газар хөдлөлтийн голомтод байсан айлуудын “ГАЗ-66” автомашин ганхаж, мотоцикль унасан бөгөөд настай хүмүүсийн дотор эвгүйрч, даралт ихсэх зэрэг өөрчлөлт мэдрэгдсэн байна. Дээрх чичирхийллийн талаар Одон орон, геофизикийн хүрээлэнгийн Газар хөдлөлт судлах секторын эрхлэгч М.Өлзийбатаас тодрууллаа.

-Өмнөговь аймгийн Ханхонгор суманд арваад хоногийн өмнө болсон газар хөдлөлтийн чичирхийлэл өнөөг хүртэл мэдрэгдсээр байгаа гэсэн. Ямар учиртай юм бол?

-Ханхонгорт болсон шиг хүчтэй газар хөдлөлтийн дараа газрын дор жижиг эвдрэл их үүсдэг. Газрын гүнд 45-50 км зузаан чулуулаг давхарга байдаг. Тэр болгон хөдөлгөөнд орж, байрлал нь их бага хэмжээгээр өөрчлөгддөг учраас эргэж хэвийн байдалдаа ороход хугацаа хэрэгтэй. Арваад жилийн өмнө Хөвсгөл аймгийн Бүсийн голын хөндийд болсон хүчтэй газар хөдлөлтийн дараа 1-2 жилийн хугацаанд 3000 гаруй удаа чичирхийлэл мэдрэгдэж байсан.

-Тэгэхээр чичирхийлэл ард иргэдэд хор хохирол учруулахгүй гэсэн үг үү?