Хууль зүйн байнгын хорооны өчигдрийн хуралдаанаар 2008 оны долдугаар сарын 1-нд болсон үйл явдлыг “эргэн дурсав”. Үймээний дараа баривчилсан хүмүүсийг мөрд өн байцаах явцад хууль, хяналтын байгууллагынхан эрүүдэн шүүж, хүний эрх зөрчсөн эсэхийг тогтоохоор Хүний эрхийн дэд хорооны ажлын хэсэг ажилласан. Тэд энэ асуудлаар тогтоолын төсөл боловсруулснаа өчигдөр тус Байнгын хороонд танилцуулсан юм.

Энэ үеэр Хууль зүй, дотоод хэргийн сайд Ц.Нямдорж цагдаагийн ажилтнуудын эрх зөрчигдсөн байхад түүнийг дурсалгүйгээр асуудалд өрөөсг өл хандсан хэмээн Ажлын хэсгийнхнийг шүүмжлэв. Тэдэнд болон хохирсон иргэдэд төрөөс нөхөн олговор олгож дуусчээ.

Ц.Нямдорж “Тэр үед машинаар чулуу зөөж зохион байгуулалттай ажилласан. Энэ хэргийн ард хэн байгааг олж тогтоох учиртай. Ард түмэн биш хэдхэн улстөрч сонгууль будилаантуулсан шүү дээ” гэлээ. Асуудлыг цогцоор нь авч үзэх саналыг Д.Тэрбишдагва гаргав.

Харин Ч.Сайханбилэг түүний эсрэг саналтай байгаа аж. Хүндхэн давааг давж долдугаар сарын 1-ний хохирогчдод нөхөн олговор олгох асуудлыг УИХ шийдсэн. Бага багаар урагшлуулж, шийдэж байхгүй бол С.Зоригийг хөнөөсөн хэрэг шиг сонгууль бүрээр сөхөгддөг асуудал болж хувирна, цогцоор гэж алгуурлах хэрэггүй гэж тэр санууллаа. Ажлын хэсгийн үндсэн зорилго нь үймээний үеэр цагдаа нар ямар арга хэмжээ авсныг биш, дараа нь баривчлагдсан хүмүүсийн эрхийг зөрчсөн эсэхийг тодруулах явдал байсан гэж ахлагч Х.Тэмүүжин хэлэв.

Мөн тэрбээр “Хүний эрх гэдгийг олон улсад төрийн дур зоргоос иргэнээ хамгаалах гэж ойлгодог. Цагдаа нар төрийн өмнөөс үүрэг гүйцэтгэсэн. Тэгээд ч бид судалж байхдаа Хууль зүй, дотоод хэргийн сайд Танд болон ЦЕГ-ын дарга Сандаг-Очирт бичиг хүргүүлж, хохирсон албан хаагчдын талаар асуусан.

ЦЕГ-ын дарга нь асуудал шийдээгүй гэсэн бол Та нөхөн төлбөрийг олгох гэж байгаа гэсэн. Өөрсдөө ажлаа хийгээгүй байж биднийг буруутгах хэрэггүй” гэлээ. Энэ үйл явдал аль аль талдаа томоохон сургамж болсон, дахин давтуулахгүй байх талаас ажиллах ёстой гэдэг дээр гишүүд санал нэгдлээ.

Ажлын хэсгийн танилцуулсан тогтоолд хууль, эрх зүйн реформын шинжтэй томоохон асуудал тусгасан, судалж, лавламаар зүйл ч бий гэнэ. Байнгын хорооноос тусдаа Ажлын хэсэг байгуулж, дараа дахин энэ талаар хэлэлцэхээр болов.

www.mongolnews.mn - Эх нутгийн чимээ