Хан-Уул
дүүргийн БуянтУхаад барьсан спортын шинэ ордныг өчигдөр манай улсад
хүлээлгэн өглөө. Уг ажиллагаанд Ерөнхий сайд С.Батболд, Олимпын наадамд
бэлтгэх үндэсний хорооны орлогч дарга, ЭМ-ийн сайд С.Ламбаа, Сангийн
сайд С.Баярцогт, БНХАУ-аас манай улсад суугаа Элчин сайд Юй Хун Яао
болон бусад төлөөлөгч оролцов.
БНХАУ-ын Засгийн газрын 111 сая юанийн буцалтгүй тусламжаар “Шанхай констракшн”-ы барьсан энэхүү ордон 5045 хүний суудалтай, 2950 ам метр талбайтай, 260 ам метр талбай бүхий бэлтгэлийн хоёр заал, 104 өрөөтэйгээс гадна урлаг соёлын томоохон арга хэмжээ зохион байгуулахад зориулсан гэрэлтүүлэг, техник технологиор тохижуулсан аж. Харин дулаан, цэвэр, бохир усны шугам болон 1000 автомашины зогсоолын ажлыг манай компаниуд хийж гүйцэтгэх юм байна.
Спортын ордныг хүлээлгэн өгөх үеэр Ерөнхий сайд С.Батболд “Цаашид эх орондоо зүүн Азийн спортын наадмыг зохион байгуулах хүчин чадалтай, 30.000 хүний суудалтай цэнгэлдэх хүрээлэн бүхий спортын цогцолбор байгуулах ажлыг үе шаттай хэрэгжүүлэхийн төлөө Засгийн газар ажиллана” хэмээн мэдэгдсэн нь спорт сонирхогчдын төдийгүй монголчуудын чихэнд чимэгтэй мэдээ байлаа.
Харин ирэх долоо хоногийн Засгийн газрын хуралдаанаар уг ордныг Төрийн өмчийн хороогоор батлуулж, төрийн өмчид бүртгэн авах юм байна. Энэ үеэр Гуанжоу хотноо болсон Азийн наадамд болон олон улсын тэмцээнд амжилттай оролцсон тамирчдыг Засгийн газраас шагнасан юм. Дэлхийн нэртэй одод оролцох “Ирмүүн” агентлагийн “Космополитан” сэтгүүлийн нээлтийн шоу ирэх долоо хоногт шинэ ордонд болно.
БТСГ-ынхан ордонд зохион байгуулж буй үйл ажиллагаанаас олсон мөнгөөрөө цахилгаан, дулаанаа хангах аж
