“Космополитан”
сэтгүүлийн 61 дэх хувилбар Монголд нээлтээ хийх гэж байгаатай
холбогдуулан тус сэтгүүлийн монгол хувилбарыг эрхлэн гаргаж буй “Ирмүүн”
агентлаг шоу тоглолт зохион байгуулах гэж байгаа тухай бид өмнө нь
мэдээлсэн. Уг арга хэмжээнд оролцох гадаадын уран бүтээлчид Монголд
хүрэлцэн ирсэнтэй холбогдуулан тус агентлагаас өчигдөр хэвлэлийн бага
хурал хийлээ.
Оросын контртенор Олег Безинских, балетийн “Тодес” хамтлаг, Азийн дива Ч.Урнаа, дэлхийн шилдэг эмэгтэй ди-жей Алисса Спутник нар хүрэлцэн ирсэн боловч үзэгчдийн анхаарлыг ихэд татаж байсан дуучин Николь Шерзингер тоглолтод оролцох боломжгүй болсон тухай уг хурлын үеэр мэдэгдлээ. Берлинээр дамжиж ирэх ёстой байсан дуучны баг Германд болж байгаа цасан шуурганы улмаас Токио, Сөүлээр дамжиж ирэх хүсэлтэйгээ мэдэгдсэн боловч, чиглэлийн энэ өөрчлөлтийн улмаас тоглолтоос өмнө амжиж ирэх боломжгүй болсон гэнэ.
“Гэнэтийн энэ өөрчлөлттэй холбоотойгоор шоуны тасалбарын үнэ, хуваарьт мөн өөрчлөлт гарсан бөгөөд хэдийнэ борлогдсон тасалбаруудыг буцаах, эсвэл зөрүү мөнгийг эргүүлэн авах боломжтой” гэж “Ирмүүн” агентлагийн захирал А.Дэлгэржаргал онцоллоо. Хоёр удаа хийхээр төлөвлөж байсан нээлтийн шоугаа тус хамт олон зөвхөн нэг өдөр буюу энэ сарын 8-ны 19.00 цагт болгон өөрчилснөөс гадна 33 мянган төгрөгийн үнэтэй тасалбарын үнийг 15 мянга, 55 мянгынхыг 20 мянга гэх мэтээр бууруулж, VIP үдэшлэгийн тасалбараа 150 долларын үнэтэй болгохоор тогтжээ.
