Хүйтний ам цаашилж, хөхүүрийн ам наашлан айсуй. Өвлийн хүйтэн болон хаврын сэрүүн улиралд хүний бие махбодид амин дэм, эрдэс бодисын дутагдал эрс нэмэгддэг. Энэ нь хүнийг амттанд дурлах, идэмхий болоход хүргэдэг байна. Үүний улмаас илүүдэл жин үүсдэг. Хавар цаг ирж хувцасаа нэмгэлэх шаардлагатай болсон үед өдрийн дэглэмээ өөрчилж, хоол хүнсэндээ анхаарлаа хандуулах хэрэгтэй. Ингэснээр бүсгүй та сайхан галбираа хадгалж, сэтгэл булаам, эрүүл, аз жаргалтай харагдах болно.  Тиймээс танд тусалж дараах зөвлөгөөг хүргэе.

Дүрэм нэг: Өөх тос ихтэй, амьтны гаралтай хүнсний бүтээгдэхүүнээс татгалзаарай

Шувуу, загасны мах нь өөх, тос багатай, шингэц сайтай байдгаас гадна бодисын солилцооны хэвийн үйл ажиллагааг хангахад зайлшгүй шаардлагатай уургаар баялаг байдаг. Хүнд өдөрт ойролцоогоор 50 граммаас багагүй уураг шаардлагатай байдаг байна. Зайдас болон хиам нь өөх тос ихтэйгээс гадна нийлмэл нэмэлт амтлагч бодисуудыг ихээр агуулдаг  тул хэт дурлахгүй байвал зүгээр.

Дүрэм хоёр: Бага багаар олон удаа хоолло

Өдөрт 5-6 удаа хооллох нь хаврын хүйтэн, тарчиг цагт хүний бие махбодийг энергээр тасралтгүй сэлбэх гол нөхцөл болж өгнө. Өдөр бүр тогтмол цагт  хооллож занших нь чухал. Ингэж хоол боловсруулах системийг тодорхой хэмнэлд оруулж чадвал бодисын солилцоо хэвийн явагдах болно. Ингэснээр таны эрүүл мэнд, гоо сайханд таатай өөрчлөлт гарна.

Дүрэм гурав: Өглөөний цайгаа орхигдуулж болохгүй
 
Өглөө цайгаа уулгүй ажилдаа гарсан хүн өдрийн хоолыг хэтэртэл идэж, хоосон ходоодоо дүүргэх нь лавтай. Энэ нь хоол боловсруулах системийг хэт их ачаалалд оруулж, хямрал үүсгэхэд хүргэнэ. Өглөөний цай нь хүний нэг өдрийн хэрэгцээт калорийн 20 хувийг хангадаг учраас цайгүй явбал тэр хэмжээгээр эрч хүч, энергээ алдаж байна гэсэн үг. Шинэ өдрийг хоосон ходоодтой эхлэх нь тийм ч таатай биш гэдгийг бүү мартаарай. Өглөөний цайг бага уувал бодисын солилцоо өдрийн турш удаан хэмнэлтэй явагдахад хүргэдэг байна. Тиймээс өглөөний цайгаа хангалттай сайн уух хэрэгтэй. Мөн шинэ өдрийг жимс, ногоо, салат, будаа идэж эхлүүлбэл өдрийн турш эрч хүчтэй цоглог байдаг  аж. Салат болон хоолыг цөцгийн тос, майонез, цөцгий гэх  мэтээр аль болох тослог багатай сүү, цөцгий, жимсний чанамал, жимстэй тараг, оливын болон эрдэнэ шиш, наранцэцгийн тос, лаазалсан жимс, ногоогоор амталж болно.

Дүрэм дөрөв: Сайн чанарын жимс ногоо түлхүү хэрэглэхийг хичээ
 
Ургамлын гаралтай хүнс нь хүний бие махбодид маш чухал амин дэм, уураг, эрдсүүдийг өгдөг. Уураг нь ажлын чадвар, энергийн эх үүсвэр юм. Мөн ургамлын тос нь ходоод гэдэсний үйл ажиллагаанд сайнаар нөлөөлж, элдэв өвчнөөс урьдчилан сэргийлдэг  байна.

Дүрэм тав: Өнгөт хоолонд дурла
 
Сэтгэл санааг өөдрөг болгоход хүнсний бүтээгдэхүүний өнгө эерэгээр  нөлөөлдөг аж. Жишээ нь: улаан өнгийн хүнс /мах, улаан лооль, улаан чинжүү, лууван/ нь цус багадалтаас сэргийлдэг. Ногоон өнгийн хүнс нь /Өргөст хэмх, вандуй, киви, салатны навч, шанцай, яншуй г.м/ өвчин эсэргүүцэх чадварыг дээшлүүлдэг. Шар, шаргал өнгийн хүнс / Жүрж, нимбэг, өндөгний шар, гадил, эрдэнэ шиш г.м/ нь бие махбодийг  эрт хөгшрөлтөөс хамгаалдаг.

Дүрэм зургаа: Хоолыг зөвхөн аягаласны дараа амтал
 
Хоолны давсыг хийхдээ хоолыг аягаласны дараа амтагдах төдий нэмж хэрэглэж сурвал таны эрүүл  мэндэд тустай. Давс  ихээр хэрэглэх нь бие махбодид шингэнийг ихээр хуримтлуулах шалтаг болж илүүдэл жин үүсэх гол нөхцөлийг бүрдүүлдэг. Хүний хэлний зөвхөн үзүүр болон хоёр хажуу нь л амтыг мэдэрдэг байна. Тиймээс хэлний үзүүрт амт өгөх төдий давс байхад л  хангалттай. Мөн давс хэрэглэх шаардлагагүй хүнсний  бүтээгдэхүүнд давсыг хэрэглэхгүй байх хэрэгтэй. Амьтны гаралтай мах, загас, бяслаг, цөцгийн тос, өндөг зэрэг нь натри хлоридоор баялаг байдаг. Тиймээс эдгээрийг хэрэглэхдээ давс бүү ашиглаарай.  

Дүрэм долоо: Шингэнийг бага хэрэглэ

Өдөрт хоёр литрээс ихгүй бас багагүй шингэн хэрэглэхэд л бие махбодид хангалттай. Зүрхний цохилт олшрох, амьсгаадах, хавагнах зэрэг нь шингэн хэтрүүлж хэрэглэсний шинж юм. Хүний бие дэх өөхөн эд нь усыг яг л уудаг цаас шиг өөртөө шингээж, битед хуримтлуулдаг байна.

Дүрэм найм: Аминдэм, эрдсийн комплекс хэрэглэ

Хүн зөвхөн хоол хүнсээр дамжуулан бие махбодид шаардлагатай эрдэс, аминдэмийг хангалттай авч хараахан чаддаггүй. Тиймээс хаврын цагт аминдэм, эрдсийн комплексыг эмчийн заавраар хэрэглэж байх нь зохимжтой.

Д.орхон